Chust tumanida tashkil etilgan sayyor qabulda viloyat hokimi X.Bozorov tuman aholisi vakillari bilan yuzma-yuz muloqot davomida ijtimoiy, iqtisodiy, maishiy masalalarga taalluqli 50 dan ortiq murojaatni ko‘rib chiqdi.

Jumladan, fuqarolarning uy-joy, ish bilan ta’minlash, salomatligini tiklash uchun moddiy yordam ko‘rsatish bo‘yicha iltimosnomalari, kommunal xizmat ko‘rsatish tizimlaridagi va tadbirkorlik faoliyatiga xalaqit berayotgan muammolar yuzasidan arznomalari va boshqa mahalliy masalalar bo‘yicha murojaatlar bo‘yicha tegishli tashkilot hamda muassasalar mutasaddilari ishtirokida hal etish choralari ko‘rildi. Shuningdek, murojaatlarning bir qismi qonunchilikda belgilangan muddatlarda o‘rganib, chora ko‘rish uchun tegishli tashkilot va idoralarga yuborilib, ijrosi nazoratga olindi.

Jumladan, bandlik hamda uy-joy masalasida hokim qabuliga kelgan, bolalar uyida ulg‘aygan fuqaro V.Polyakovga ishga yo‘llanma berildi, uy-joy masalasi ham yaqin kunlarda hal qilinadigan bo‘ldi. Bibiona mahallasida yashovchilarning murojaati asosida mahallaga yangi elektr podstansiyasi o‘rnatiladigan va mahalla ko‘chalarini asfaltlash 2020 yil dasturiga kiritiladigan bo‘ldi.

Shuningdek, sayyor qabulga jalb qilingan viloyat tashkilotlari rahbarlari Chust shahri Pansada mahallasida yashovchilarning muammolarini o‘rgandi.

Viloyat rahbari avvaldan tushgan murojaatlar natijasida mahalla hududida obodonlashtirish ishlari olib borilishi yuzasidan berilgan topshiriqlarning amalda bajarilishi bilan tanishish maqsadida ko‘chalarga shag‘al yotqizilib, yo‘l bo‘yidagi devorlar ta’mirlanayotgan hududlarda bo‘ldi.

Tuman mutasaddilariga ko‘chalarni yog‘inli kunlarga qolmasdan asfaltlash, tungi tejamkor yoritkichlarni o‘rnatish bo‘yicha ko‘rsatma berildi.

Shunday sayyor qabullar Chortoq tumanining Sozsoy qishlog‘i, Pop tumanining Oltinkon shaharchalarida ham o‘tkazildi.