Samarqand viloyati Paxtachi tumanida yangi qurib bitkazilgan Davlat xizmatlari markazi binosining ochilish marosimi bo‘lib o‘tdi. Unda Samarqand viloyati hokimi Erkinjon Turdimov ishtirok etdi.

Markazda tuman adliya va FHDYo bo‘limlari, notarius va Bosh vazirning tadbirkorlar qabulxonasi joylashgani fuqarolarga anchagina qulayliklar yaratadi. Shuningdek, binoda kafe, bolalar xonasi, tibbiyot xonasi, investorlar xonasi, elektron navbat tizimi joriy etilgan bo‘lib, xalq banki kassasi ham joylashtirilgan. Tuman hokimligi axborot xizmatining ma’lumotiga ko‘ra barcha shart-sharoitlarga ega markazda kuniga 300 nafardan ortiq fuqarolarga 120 turdagi davlat xizmatlari ko‘rsatiladi.

Binoning kirish qismida QR kodlari ustuni fuqarolar e’tiboriga havola etilgan bo‘lib, unda Davlat xizmatlari markazida ko‘rsatadigan xizmat turlari haqida batafsil ma’lumot olish mumkin.

3 milliard 300 million so‘m mablag‘ evaziga barpo qilingan 2 qavatli ushbu zamonaviy bino “Madina Savdo belgisi“ xususiy qurilish korxonasi tomonidan 5 oy davomida qurib bitkazildi.