Oʻzbekiston Respublikasi Bosh prokurori N.Yoʻldoshev fuqarolarni videokonferens-aloqa tizimi orqali, yaʼni masofadan turib onlayn qabul qildi.

Bu haqda Bosh prokuratura matbuot xizmati xabar berdi. Qayd etilishicha, qabul davomida Bosh prokuror tomonidan 26 nafar jismoniy va yuridik shaxslarning vakili qabul qilinib, ularning murojaati tinglandi.

Murojaatlarning 17 tasi sud, 2 tasi prokuratura, 5 tasi ichki ishlar, 1 tasi xalqaro hamda 1 tasi tadbirkorlik faoliyati masalasiga oid boʻldi.

Bosh prokuraturada barcha qulayliklarga ega boʻlgan fuqarolar qabulxonasi boʻlib, fuqarolar hamda yuridik shaxslarning vakillari hech bir toʻsiqlarsiz kirishlari, oʻzlarini qiziqtirgan masala yoxud muammolari yuzasidan prokuratura xodimlari qabulida boʻlib, murojaatlarini qoldirishlari uchun barcha sharoitlar yaratilgan.

Biroq shu kuni Toshkent shahrida yashovchi Ye.Urlayeva bir guruh shaxslar bilan birga Bosh prokuraturaning maʼmuriy binosi oldida Bosh prokuror tomonidan fuqarolarning qabuli oʻtkazilmaganligi haqida norasmiy norozilik namoyishi oʻtkazishdi.

Shuningdek, Toshkent viloyati, Yangiyoʻl tumanida yashovchi M.Akbarova va Toshkent shahrida yashovchi Sh.Yuldasheva hamda boshqa shaxslar Bosh prokuraturaning fuqarolarni qabul qilishga ixtisoslashmagan binosi oldida odamlarning eʼtiborini oʻziga jalb qilib, tartibga amal qilmasdan, ushbu binoga kirishga harakat qilishib, norasmiy norozilik namoyishi oʻtkazishdi.

Maʼlumot tariqasida: M.Akbarova 24.03.2019-yilda Bosh prokuror sayyor qabulida, Sh.Yuldasheva 20.04.2018-yil, 09.02.2019-yil hamda 25.03.2019-yilda Bosh prokuror qabulida boʻlishgan va ularning murojaatlari Bosh prokuratura tomonidan tegishli tartibda koʻrib chiqilib, javob xatlari berilgan.

Bosh prokuratura tomonidan jismoniy shaxslar va yuridik shaxslarning vakillarini qabul qilish hamda murojaatlarini koʻrib chiqish borasida ishlar davom ettirilmoqda.

OʻzA