Prezidentimiz tomonidan ilgari surilgan besh tashabbusni Urgutda amalga oshirish boʻyicha “Yoʻl xaritasi” tasdiqlandi.

Samarqand viloyati hokimi E.Turdimov tomonidan tasdiqlangan “Yoʻl xaritasi”da besh tashabbusni amalga oshirish boʻyicha masʼullar va chora-tadbirlar belgilandi.Unga koʻra, tumandagi 135 ta umumiy oʻrta taʼlim maktabini 3 turdagi (rubob, dutor, doira) musiqa asboblari bilan taʼminlash orqali qoʻshimcha 150 ta toʻgarak tashkil etiladi. Shuningdek, maktablarda havaskor yoshlar teatr va ansambllari tuziladi.

Tumandagi barcha korxona, tashkilot, muassasalar ishchi-xodimlari, oʻquvchilar, katta yoshdagi aholi oʻrtasida ertalabki gimnastika mashgʻulotlari, haftada bir kun sport tadbirlari yoʻlga qoʻyiladi.

Urgut markaziy madaniyat va aholi dam olish maskanida, tuman markazidagi musiqa maktabida, amfiteatrda va boshqa aholi gavjum maskanlanda wi-fi hududi tashkil etiladi.

Umumtaʼlim maktablari, bogʻchalar va mahallalarga 18 mingdan ortiq kitob tarqatiladi. Tumanning olis qishloqlarida tikuv-trikotaj majmualarini ishga tushirish hisobiga 400 nafar xotin-qizlar ish bilan taʼminlanadi. Besh tashabbusni Urgutda amalga oshirish doirasida 600 nafar yoshlarni haq toʻlanadigan jamoat ishlariga jalb etish rejalashtirilgan.

Gʻolib Hasanov, OʻzA