Prezident Shavkat Mirziyoevning joriy yil 11 yanvarda Samarqand viloyatiga tashrifi davomida o’tkazilgan yig’ilish bayonida Payariq tibbiyot kollejining foydalanilmayotgan yotoqxona binosini uy-joyga moslashtirib ehtiyojmand oilalar, nogironligi bo’lgan shaxslarga berish bo’yicha chora-tadbirlar belgilangan edi.

Ushbu topshiriq bajarilib, kollejning ikki qavatli yotoqxona binosi qayta ta'mirlandi va 33 nafar nogironligi bo’lgan, kam ta'minlangan, uy-joyga muhtoj oilalarga topshirildi. Shu munosabat bilan tashkil etilgan tadbirda Samarqand viloyati hokimi o’rinbosari, xotin-qizlar qo’mitasi raisi G.Аlimova, Payariq tumani hokimi D.Musinov va jamoatchilik vakillari ishtirok etdi.

– Ikkinchi farzandimni dunyoga keltirgach, ko’zim ojiz bo’lib qoldi, – deydi To’polos mahallasida yashovchi Gulsanam To’raeva. – To’rt yildan beri onamnikida yashayman. Xalqimiz bejiz "O’z uying – o’lan to’shaging", deb aytmagan. Bugun shunday baxtga musharraf bo’ldim. Bu baxtni hadya etganlardan minnatdorman.

Shuningdek, ushbu binoda turmushida murakkab vaziyatga tushib qolgan, oilasida zo’ravonlikka duch kelgan ayollar va ularning farzandlari uchun "Аyollar ijtimoiy moslashuv maslahat markazi" ham o’z faoliyatini boshladi. 

O’zА