Oʻzbekiston davlat sanʼat va madaniyat instituti tashabbusi bilan bundan bir yil avval Moʻynoq tumani Shagʻirli ovulida bunyod etilgan “Qoʻqon bogʻi”ga ekilgan daraxtlar kurtak yoza boshladi boshladi.

Hozirgi kunda ushbu joyda ekilgan mevali va manzarali daraxtlarning asosiy qismi, yerga moslashib tutib ketdi.

–Moʻynoq tumanidagi ekologik muammoni bartaraf etishda oʻz ulushini qoʻshish maqsadida Oʻzbekiston davlat sanʼat va madaniyat instituti rahbariyati tashabbusi bilan oʻtgan yili “Qoʻqon bogʻi” tashkil etilgan edi, – deydi Oʻzbekiston davlat sanʼat va madaniyat instituti Nukus filiali direktori P.Paaluaniyazov. – Muassasaning Fargʻona va Nukus filiallari ishtirokida bogʻni barpo etishda mevali daraxtlar va Kaliforniya daraxti qalamchalari olib kelinib ekilgan edi. Bu bogʻ Orol dengizining qurishi oqibatida yuzaga kelayotgan ekologik vaziyatni yaxshilashda oz boʻlsada oʻz taʼsirini koʻrsatadi deb oʻylaymiz.

Ushbu xayrli ishning mantiqiy davomi sifatida oʻrmon xoʻjaligi tasarrufidagi 2 gektar maydonda Oʻzbekiston Milliy universitetining oʻquv-ilmiy maydonchasi tashkil etilib, ushbu universitetning talaba-yoshlari bogʻ barpo qilmoqda. Mazkur ishga Nukus davlat pedagogika instituti hamda Qoraqalpoq davlat universiteti talabalari ham hamkorlik qilmoqda.

“Orol va yoshlar” shiori ostida tashabbuskor talaba-yoshlar oʻquv-ilmiy ekspeditsiyasi aʼzolari tomonidan tashkil qilingan ushbu tadbirning dastlabki kunida hudud toʻliq koʻchatlar ekish uchun tayyorlandi.

Ekspeditsiyaning axborot xizmati maʼlumotiga koʻra, hozirda bogʻ yaratish ishlari boshlanib, hududni simmetrik oʻlchash, joʻyak olish, chuqurchalar qazish, tuproq geomorfologiyasini tadqiq qilish kabi ishlar bajarildi. Archa va tok koʻchatlari ekildi. Umuman, yangi bogʻga 12 turdagi mevali, manzarali oʻsimliklar ekilishi reja qilingan.

Talabalarning ilmiy-tadqiqot ishlari predmeti aynan Orol muammosi, Orolboʻyi tuprogʻi, oʻsimliklari, suvlari, ularning tarkibi hamda xususiyatlarini tadqiq etishdir.

Ekspeditsiya aʼzolari hududda ilmiy-tadqiqot ishlarini olib borib, Orolboʻyi tuproqlari, oʻsimliklari, suvlari va ularning tarkibi hamda xususiyatlarini oʻrganadi.