Sirdaryo viloyati hokimi Erkinjon Turdimov navbatdagi shaxsiy qabulda fuqarolarning turli sohalardagi muammolariga alohida e’tibor qaratdi. Qabulda har bir murojaat mas’ul rahbarlar ishtirokida ko‘rib chiqildi va ularni hal etish uchun aniq chora-tadbirlar belgilandi.

Viloyat hokimi fuqarolar bilan doimiy muloqot va hamkorlikni kuchaytirish, ularning talab va takliflarini tizimli ravishda ko‘rib borish zarurligini ta’kidladi.

Qabul Sirdaryo viloyati Savdo-sanoat palatasi viloyat boshqarmasida bo‘lib o‘tdi. Unda 10 nafar fuqaro ijtimoiy himoya, bandlik, uy-joy ta’miri, kredit va bank masalalari, tibbiy yordam, infratuzilma va huquqiy masalalar bo‘yicha murojaat qildi.

Xovos tumanining Mustaqillik mahallasida istiqomat qiluvchi fuqaro Jahongir Murodqulov rafiqasini nogironlik nafaqasiga chiqarish uchun amaliy yordam so‘radi. Viloyat hokimligi tomonidan ushbu murojaat sog‘liqni saqlash va ijtimoiy himoya tizimi mas’ullariga qonuniy tartibda ko‘rib chiqish topshirildi.

Shu tumanning  Paxtakor mahallasida istiqomat qiluvchi fuqaro Muxlisa Abdullayeva esa tabiiy gaz va elektr tarmog‘i bilan ta’minlash masalasini ko‘tardi. Mavjud chora-tadbirlar natijasida bu murojaatni hal etish ishlari allaqachon boshlangani ma’lum qilindi.

Huquqiy masalalar ham e’tibordan chetda qolmadi. Baxtiyor Qosimov mulkiy nizo yuzasidan murojaat qilib, to‘langan mablag‘ni undirishda huquqiy yordam so‘radi. Viloyat hokimi va huquqni muhofaza qiluvchi organlar tomonidan masala sud va qonun doirasida hal etilishi tushuntirildi.

Qabul yakunida Erkinjon Turdimov har bir murojaat shaxsiy nazoratga olinishini ta’kidlab, mas’ul rahbarlarga fuqarolar muammolariga befarq bo‘lmasdan, o‘z vaqtida va qonuniy yechim topish zarurligini ma’lum qildi.