Qo‘shrabotlik Zarif Qayumovga boshqa mahallada yashash manzili ko‘rsatilgan holda soliq qarzdorligini to‘lash haqida hujjat keldi. Z. Qayumov bu muammoning yechimini izlab Samarqand viloyat sudi rahbariyatining Qo‘shrabot tumanida tashkil etilgan sayyor qabuliga keldi. Viloyat sudi raisi qabulida murojaatini bayon qilib, hujjatlarini taqdim qildi.

Z. Qayumovning murojaati va hujjatlari sayyor qabul davomida tashkil etilgan Fuqarolik ishlari bo‘yicha Ishtixon tumanlararo sudi sayyor sudi majlisida ko‘rib chiqildi va soliq idorasi tomonidan noto‘g‘ri qo‘llanilgan qarzdorlik rad etildi.

Sherzod Irisov sodir qilgan qilmishi uchun sud tomonidan tayinlangan ozodlikdan cheklash jazosini o‘tayotgan edi. Jazoni o‘tash davrida tartib- intizomga qat’iy rioya qildi, o‘ziga tegishli xulosa chiqardi. U Qo‘shrabotda o‘tkazilayotgan sayyor qabulga keldi va viloyat sudi rahbariyati qabulida qilmishidan pushaymonligi, tegishli xulosa chiqarganligini bildirib, jazoning o‘talmay qolgan qismidan ozod qilishni so‘radi. Uning murojaati Jinoyat ishlari bo‘yicha Qo‘shrabot tuman sudining sayyor sud majlisida ko‘rib chiqildi va qanoatlantirildi.

Viloyat sudi rahbariyatining Qo‘shrabotda o‘tkazilgan sayyor qabuli har jihatdan samarali bo‘ldi.  

Samarqand viloyat sudi raisi Olim Hayitov, o‘rinbosarlari Tolib Boyzoqov va Zafar Allabayev Qo‘shrabot tumanida aholi bilan uchrashuv, davra suhbati va sayyor qabul o‘tkazdi.  

Qabul jarayonida jinoyat, fuqarolik, iqtisodiy va ma’muriy masalalar yuzasidan fuqarolar murojaatlari ko‘rib chiqildi.

Viloyat sudi raisi davlatimiz rahbariing 2025 yil 21 avgustdagi “Sudlar faoliyatiga sun’iy intellekt texnologiyalarini joriy etish orqali odil sudlovga erishish darajasini oshirish hamda sud tizimining moddiy-texnika ta’minotini yaxshilashga doir qo‘shimcha chora-tadbirlar to‘g‘risida”gi hamda “Odil sudlov sohasida yuqori malakali kadrlar tayyorlash tizimini tubdan takomillashtirish chora-tadbirlari to‘g‘risida”gi farmonlari yuzasidan batafsil tushuntirish berdi.

Muloqot tarzida tashkil etilgan uchrashuvda tadbir ishtirokchilari ham faol ishtirok etishdi va savollariga batafsil javoblar olishdi.

Shundan so‘ng, sayyor qabul tashkil etildi. Sayyor qabulda 14 ta murojaat qayd etildi.

Shuningdek, sodir qilgan jinoiy qilmishi uchun sud hukmi bilan jazosini o‘tayotgan 11 nafar fuqaro sayyor qabulda qilmishidan pushaymonligi, tegishli xulosa chiqarganligi, tuzalish yo‘liga qat’iy o‘tganligini, bundan buyon sog‘lom turmush tarzida hayot kechirishini bildirib, jazoning o‘talmay qolgan qismidan ozod qilishni so‘radi.  

Shu yerda jinoyat ishlari bo‘yicha sayyor sud tashkil etildi va har bir holat alohida ko‘rib chiqilib, murojaatlar ijobiy hal etildi.  

Sud-huquq masalalari yuzasidan tushgan barcha murojaatlarga alohida e’tibor qaratildi.