Қўшработлик Зариф Қаюмовга бошқа маҳаллада яшаш манзили кўрсатилган ҳолда солиқ қарздорлигини тўлаш ҳақида ҳужжат келди. З. Қаюмов бу муаммонинг ечимини излаб Самарқанд вилоят суди раҳбариятининг Қўшработ туманида ташкил этилган сайёр қабулига келди. Вилоят суди раиси қабулида мурожаатини баён қилиб, ҳужжатларини тақдим қилди.

З. Қаюмовнинг мурожаати ва ҳужжатлари сайёр қабул давомида ташкил этилган Фуқаролик ишлари бўйича Иштихон туманлараро суди сайёр суди мажлисида кўриб чиқилди ва солиқ идораси томонидан нотўғри қўлланилган қарздорлик рад этилди.

Шерзод Ирисов содир қилган қилмиши учун суд томонидан тайинланган озодликдан чеклаш жазосини ўтаётган эди. Жазони ўташ даврида тартиб- интизомга қатъий риоя қилди, ўзига тегишли хулоса чиқарди. У Қўшработда ўтказилаётган сайёр қабулга келди ва вилоят суди раҳбарияти қабулида қилмишидан пушаймонлиги, тегишли хулоса чиқарганлигини билдириб, жазонинг ўталмай қолган қисмидан озод қилишни сўради. Унинг мурожаати Жиноят ишлари бўйича Қўшработ туман судининг сайёр суд мажлисида кўриб чиқилди ва қаноатлантирилди.

Вилоят суди раҳбариятининг Қўшработда ўтказилган сайёр қабули ҳар жиҳатдан самарали бўлди.  

Самарқанд вилоят суди раиси Олим Ҳайитов, ўринбосарлари Толиб Бойзоқов ва Зафар Аллабаев Қўшработ туманида аҳоли билан учрашув, давра суҳбати ва сайёр қабул ўтказди.  

Қабул жараёнида жиноят, фуқаролик, иқтисодий ва маъмурий масалалар юзасидан фуқаролар мурожаатлари кўриб чиқилди.

Вилоят суди раиси давлатимиз раҳбариинг 2025 йил 21 августдаги “Судлар фаолиятига сунъий интеллект технологияларини жорий этиш орқали одил судловга эришиш даражасини ошириш ҳамда суд тизимининг моддий-техника таъминотини яхшилашга доир қўшимча чора-тадбирлар тўғрисида”ги ҳамда “Одил судлов соҳасида юқори малакали кадрлар тайёрлаш тизимини тубдан такомиллаштириш чора-тадбирлари тўғрисида”ги фармонлари юзасидан батафсил тушунтириш берди.

Мулоқот тарзида ташкил этилган учрашувда тадбир иштирокчилари ҳам фаол иштирок этишди ва саволларига батафсил жавоблар олишди.

Шундан сўнг, сайёр қабул ташкил этилди. Сайёр қабулда 14 та мурожаат қайд этилди.

Шунингдек, содир қилган жиноий қилмиши учун суд ҳукми билан жазосини ўтаётган 11 нафар фуқаро сайёр қабулда қилмишидан пушаймонлиги, тегишли хулоса чиқарганлиги, тузалиш йўлига қатъий ўтганлигини, бундан буён соғлом турмуш тарзида ҳаёт кечиришини билдириб, жазонинг ўталмай қолган қисмидан озод қилишни сўради.  

Шу ерда жиноят ишлари бўйича сайёр суд ташкил этилди ва ҳар бир ҳолат алоҳида кўриб чиқилиб, мурожаатлар ижобий ҳал этилди.  

Суд-ҳуқуқ масалалари юзасидан тушган барча мурожаатларга алоҳида эътибор қаратилди.