Ayni vaqtda yurtimiz bo‘ylab kuz-qish mavsumiga tayyorgarlik ishlari jadallik bilan olib borilmoqda. Kuz-qish mavsumini betalafot o‘tkazish maqsadida kommunal sohaga daxldor xizmatlarning ish sifati va samaradorligini oshirish bo‘yicha zarur choralar ko‘rilgan.

Ma’lumot o‘rnida aytish joiz, bugungi kunda O‘zbekistonda 1,5 milliondan ortiq xonadondan iborat 44 ming 280 ta ko‘p kvartirali uylar mavjud. Ulardan,  qariyb 40 mingta uyga 971 ta boshqaruv servis kompaniyasi, 851 ta uyga 241 ta uy-joy mulkdorlari shirkati va 852 ta uyga bevosita  o‘z-o‘zini boshqaruvchi organlar tomonidan xizmat ko‘rsatiladi.

E’tiborlisi, uy-joy mulkdorlarining shaxsiy identifikatsiya raqami va ularning tegishli mol-mulki kadastr raqamidan foydalangan holda sohaga billing tizimi joriy etilgan. “Mening uyim” billing tizimi orqali boshqaruv organlariga 2022 yilda 41 foiz majburiy badal kelib tushgan bo‘lsa, joriy yilning 6 oylik davrida bu ko‘rsatkich 93 foizga yetkazildi.

Sohada shaffoflikni oshirish, noqonuniy xatti-harakatlarga chek qo‘yish, boshqaruv organlari hamda aholi o‘rtasidagi munosabatlarni tartibga solish va tizimda inson omilini kamaytirishda raqamlashtirishga alohida e’tibor qaratib kelinmoqda. 

Vazirlar Mahkamasining 853-son qarori bilan boshqaruv organlarini elektron reyestrga kiritish, shuningdek, ko‘p qavatli uylarni boshqaruv organlariga biriktirish endilikda davlat xizmatlari orqali amalga oshiriladi. 

Qurilish va uy-joy kommunal xo‘jaligi vazirligining ma’lum qilishicha, 2025-2026 yillar kuz-qish mavsumiga tayyorgarlik doirasida boshqaruv organlari tomonidan jami 9 ming 812 ta ko‘p kvartirali uyni 247 milliard so‘m mablag‘ hisobidan joriy ta’mirlash rejalashtirilgan. Mazkur ishlarni boshlash uchun respublikadagi mavjud ko‘p kvartirali uylar xatlovdan o‘tkazilib, kuz-qish mavsumiga tayyorlash zarur bo‘lgan ta’mirtalab uylar ro‘yxati shakllantirildi. Bunda eng avvalo, aholi murojaatlari hamda hududlardagi mavjud muammolar o‘rganilib, chuqur tahlil qilindi. 

Ushbu ishlar tijorat banklari tomonidan kredit mablag‘lari jalb qilinmagan holda 754 ta boshqaruv organlari tomonidan amalga oshirilmoqda. Bugungi kunda dastur doirasida 4 mingdan ortiq ko‘p kvartirali uyda ta’mirlash ishlari yakuniga yetkazildi. 

Belgilangan reja ko‘rsatkichlarini joriy yilning1 oktyabr sanasiga qadar yakunlash rejalashtirilgan.

Ayni vaqtda “Issiqlikta’minoti” AJ va hududiy tashkilotlar tomonidan issiqlik ta’minoti tizimini 2025-2026 yillar kuz-qish davrida barqaror ishlashga tayyorlash maqsadida 53 ta qozon va 93,3 km issiqlik tarmoqlarini mukammal, 598 ta qozon va 519,1 km issiqlik tarmoqlarini joriy ta’mirlash ishlari rejalashtirilgan.

Bugungi kunda 22 ta (42 %) qozon va 72 km (77 %) issiqlik tarmog‘i mukammal hamda 583 ta (97 %) qozon va 400 km (77 %) issiqlik tarmoqg‘ida joriy ta’mirlash ishlari bajarildi. 

Shu bilan birga, kuz-qish mavsumini betalafot o‘tkazish, issiqlik quvurlari, qozon va qozon yordamchi uskunalarida yuzaga kelgan nosozliklarni zudlik bilan bartaraf etish maqsadida 8,4 km issiqlik tarmog‘i, 410 dan ortiq zadvijka, 3 379 kg elektrod va 35 ta dizel generator zaxirasi yaratildi.

Mavsum davomida havo haroratining keskin pasayish holatlari kuzatilganda iste’molchilarga belgilangan parametrda issiqlik energiyasi yetkazib berish maqsadida 26 ming 500 tonna mazut hamda 16 ming 200 tonna ko‘mir zaxirasi yaratildi. Bundan tashqari, qozonxonalarda ishchi holatdagi zaxira qozonlar ham soz holatga keltirilmoqda.

Ichimlik suv ta’minoti va oqova suv xizmati sohasida normativ-huquqiy bazani takomillashtirish, sohada yagona davlat siyosatini yuritish bo‘yicha ham bir qator ishlar amalga oshirilib, mazkur yo‘nalishda so‘nggi uch yilda 25 ta normativ-huquqiy hujjat va dasturlar ishlab chiqildi.

Davlat byudjetidan ajratilgan 50 milliard so‘m mablag‘ hisobidan 2024-2025 yilda 14 ta ichimlik suv inshooti qurish va 231 km uzunlikdagi tarmoq tortish rejalashtirilgan.

Bugungi kunda mazkur 9 ta ob’ektda 183 km uzunlikdagi tarmoq tortildi va 14 ta inshootda qurilish-montaj ishlari olib borilmoqda.

Ichimlik suv ta’minoti ob’ektlari va uskunalarini 2024-2025 yillar kuz-qish davriga tayyorlash maqsadida hududlardagi ichimlik suvi tarmoqlarining 3 272 km uzunlikdagi tarmoqlar va 1 ming 583 ta nasos uskunalarini joriy va mukammal ta’mirlash rejalashtirilgan.

Hozirga qadar 1 ming 607 km uzunlikdagi ichimlik suv tarmoqlari va 1 ming 60 ta nasos uskunalari ta’mirlandi.