Айни вақтда юртимиз бўйлаб куз-қиш мавсумига тайёргарлик ишлари жадаллик билан олиб борилмоқда. Куз-қиш мавсумини беталафот ўтказиш мақсадида коммунал соҳага дахлдор хизматларнинг иш сифати ва самарадорлигини ошириш бўйича зарур чоралар кўрилган.

Маълумот ўрнида айтиш жоиз, бугунги кунда Ўзбекистонда 1,5 миллиондан ортиқ хонадондан иборат 44 минг 280 та кўп квартирали уйлар мавжуд. Улардан,  қарийб 40 мингта уйга 971 та бошқарув сервис компанияси, 851 та уйга 241 та уй-жой мулкдорлари ширкати ва 852 та уйга бевосита  ўз-ўзини бошқарувчи органлар томонидан хизмат кўрсатилади.

Эътиборлиси, уй-жой мулкдорларининг шахсий идентификация рақами ва уларнинг тегишли мол-мулки кадастр рақамидан фойдаланган ҳолда соҳага биллинг тизими жорий этилган. “Менинг уйим” биллинг тизими орқали бошқарув органларига 2022 йилда 41 фоиз мажбурий бадал келиб тушган бўлса, жорий йилнинг 6 ойлик даврида бу кўрсаткич 93 фоизга етказилди.

Соҳада шаффофликни ошириш, ноқонуний хатти-ҳаракатларга чек қўйиш, бошқарув органлари ҳамда аҳоли ўртасидаги муносабатларни тартибга солиш ва тизимда инсон омилини камайтиришда рақамлаштиришга алоҳида эътибор қаратиб келинмоқда. 

Вазирлар Маҳкамасининг 853-сон қарори билан бошқарув органларини электрон реестрга киритиш, шунингдек, кўп қаватли уйларни бошқарув органларига бириктириш эндиликда давлат хизматлари орқали амалга оширилади. 

Қурилиш ва уй-жой коммунал хўжалиги вазирлигининг маълум қилишича, 2025-2026 йиллар куз-қиш мавсумига тайёргарлик доирасида бошқарув органлари томонидан жами 9 минг 812 та кўп квартирали уйни 247 миллиард сўм маблағ ҳисобидан жорий таъмирлаш режалаштирилган. Мазкур ишларни бошлаш учун республикадаги мавжуд кўп квартирали уйлар хатловдан ўтказилиб, куз-қиш мавсумига тайёрлаш зарур бўлган таъмирталаб уйлар рўйхати шакллантирилди. Бунда энг аввало, аҳоли мурожаатлари ҳамда ҳудудлардаги мавжуд муаммолар ўрганилиб, чуқур таҳлил қилинди. 

Ушбу ишлар тижорат банклари томонидан кредит маблағлари жалб қилинмаган ҳолда 754 та бошқарув органлари томонидан амалга оширилмоқда. Бугунги кунда дастур доирасида 4 мингдан ортиқ кўп квартирали уйда таъмирлаш ишлари якунига етказилди. 

Белгиланган режа кўрсаткичларини жорий йилнинг1 октябрь санасига қадар якунлаш режалаштирилган.

Айни вақтда “Иссиқликтаъминоти” АЖ ва ҳудудий ташкилотлар томонидан иссиқлик таъминоти тизимини 2025-2026 йиллар куз-қиш даврида барқарор ишлашга тайёрлаш мақсадида 53 та қозон ва 93,3 км иссиқлик тармоқларини мукаммал, 598 та қозон ва 519,1 км иссиқлик тармоқларини жорий таъмирлаш ишлари режалаштирилган.

Бугунги кунда 22 та (42 %) қозон ва 72 км (77 %) иссиқлик тармоғи мукаммал ҳамда 583 та (97 %) қозон ва 400 км (77 %) иссиқлик тармоқғида жорий таъмирлаш ишлари бажарилди. 

Шу билан бирга, куз-қиш мавсумини беталафот ўтказиш, иссиқлик қувурлари, қозон ва қозон ёрдамчи ускуналарида юзага келган носозликларни зудлик билан бартараф этиш мақсадида 8,4 км иссиқлик тармоғи, 410 дан ортиқ задвижка, 3 379 кг электрод ва 35 та дизел генератор захираси яратилди.

Мавсум давомида ҳаво ҳароратининг кескин пасайиш ҳолатлари кузатилганда истеъмолчиларга белгиланган параметрда иссиқлик энергияси етказиб бериш мақсадида 26 минг 500 тонна мазут ҳамда 16 минг 200 тонна кўмир захираси яратилди. Бундан ташқари, қозонхоналарда ишчи ҳолатдаги захира қозонлар ҳам соз ҳолатга келтирилмоқда.

Ичимлик сув таъминоти ва оқова сув хизмати соҳасида норматив-ҳуқуқий базани такомиллаштириш, соҳада ягона давлат сиёсатини юритиш бўйича ҳам бир қатор ишлар амалга оширилиб, мазкур йўналишда сўнгги уч йилда 25 та норматив-ҳуқуқий ҳужжат ва дастурлар ишлаб чиқилди.

Давлат бюджетидан ажратилган 50 миллиард сўм маблағ ҳисобидан 2024-2025 йилда 14 та ичимлик сув иншооти қуриш ва 231 км узунликдаги тармоқ тортиш режалаштирилган.

Бугунги кунда мазкур 9 та объектда 183 км узунликдаги тармоқ тортилди ва 14 та иншоотда қурилиш-монтаж ишлари олиб борилмоқда.

Ичимлик сув таъминоти объектлари ва ускуналарини 2024-2025 йиллар куз-қиш даврига тайёрлаш мақсадида ҳудудлардаги ичимлик суви тармоқларининг 3 272 км узунликдаги тармоқлар ва 1 минг 583 та насос ускуналарини жорий ва мукаммал таъмирлаш режалаштирилган.

Ҳозирга қадар 1 минг 607 км узунликдаги ичимлик сув тармоқлари ва 1 минг 60 та насос ускуналари таъмирланди.