Jizzaxda ko‘p kvartirali uylarda yashovchi mulkdorlar va boshqaruv kompaniyalari o‘rtasidagi huquqiy munosabatlarga oyna tutuvchi muhim tadbir bo‘lib o‘tdi.

Viloyat sudi tashabbusi bilan tashkil etilgan mazkur seminarda sohadagi dolzarb muammolar, ularni sudda ko‘rib chiqish amaliyoti va yechim yo‘llari muhokama etildi.

Jizzax yuridik texnikumi binosida o‘tkazilgan tadbirda sudyalar, prokuratura xodimlari, boshqaruv kompaniyalari va kommunal xizmat ko‘rsatuvchi tashkilotlar vakillari ishtirok etishdi. Oliy sud tomonidan tayyorlangan huquqiy qo‘llanma va turli metodik materiallar tarqatildi. Ammo amaliyotda faoliyat yuritayotgan boshqaruv kompaniyalari uchun qo‘llanmalardan ko‘ra, aniq nazorat va mas’uliyatli yondashuv ko‘proq samara berishi ehtimoldan xoli emas.

Sudya Ermamat Tojiboyev o‘z ma’ruzasida, ayrim boshqaruv kompaniyalari qarzdorlikni undirishda avvalo mulkdorlarni rasmiy ravishda ogohlantirmasdan sudga murojaat qilayotganini ta’kidladi. Natijada nizolar soni keskin ortib, sud ishlari sun’iy ravishda ko‘paymoqda.

Yana bir jiddiy muammo – sud muhokamalarida taqdim etilayotgan hujjat va dalillarning yetarli emasligi. Qarz qanday yuzaga kelgan, qanday xizmat ko‘rsatilgan yoki qanday ta’mirlash ishlari amalga oshirilgani haqida asosli ma’lumotlar ko‘p hollarda taqdim etilmayapti. Bu esa sud qarorlarining xolis va adolatli chiqarilishiga to‘sqinlik qilmoqda.

Tadbir davomida prokuratura va qurilish sohasi vakillari ham so‘zga chiqib, boshqaruv kompaniyalari faoliyatida shaffoflikni ta’minlash, mulkdorlar bilan munosabatlarda huquqiy madaniyatni yuksaltirish, hamkorlikni mustahkamlash zarurligini qayd etdilar.

Seminarda ishtirokchilar sudyalardan o‘zlarini qiziqtirgan savollarga javob oldilar. Bu jarayon faqat muloqot bilan cheklanib qolmay, muammolarga yechim topishga qaratilgan konstruktiv fikr almashinuvi tarzida kechdi. Ya’ni ishtirokchilar muammoning ildizigacha yetib borish, aniq taklif va tavsiyalar bildirish orqali amalda foydali natijalarga yo‘naltirilgan muloqot olib borishdi.

Ammo shunisi ayonki, bunday uchrashuvlar ma’lum muddatgacha foyda beradi, to‘liq tizimli o‘zgarishlarni esa samarali nazorat va qat’iy mas’uliyatsiz tasavvur etib bo‘lmaydi.

Amaliy ahamiyatga ega ushbu seminar, shubhasiz, boshqaruv kompaniyalari va mulkdorlar o‘rtasidagi munosabatlarda huquqiy yondashuvni mustahkamlashga xizmat qiladi. Ammo ko‘tarilgan masalalardan ko‘rinib turibdiki, bu borada hali yechilmagan muammolar yetarlicha.