Жиззахда кўп квартирали уйларда яшовчи мулкдорлар ва бошқарув компаниялари ўртасидаги ҳуқуқий муносабатларга ойна тутувчи муҳим тадбир бўлиб ўтди.

Вилоят суди ташаббуси билан ташкил этилган мазкур семинарда соҳадаги долзарб муаммолар, уларни судда кўриб чиқиш амалиёти ва ечим йўллари муҳокама этилди.

Жиззах юридик техникуми биносида ўтказилган тадбирда судьялар, прокуратура ходимлари, бошқарув компаниялари ва коммунал хизмат кўрсатувчи ташкилотлар вакиллари иштирок этишди. Олий суд томонидан тайёрланган ҳуқуқий қўлланма ва турли методик материаллар тарқатилди. Аммо амалиётда фаолият юритаётган бошқарув компаниялари учун қўлланмалардан кўра, аниқ назорат ва масъулиятли ёндашув кўпроқ самара бериши эҳтимолдан холи эмас.

Судья Эрмамат Тожибоев ўз маърузасида, айрим бошқарув компаниялари қарздорликни ундиришда аввало мулкдорларни расмий равишда огоҳлантирмасдан судга мурожаат қилаётганини таъкидлади. Натижада низолар сони кескин ортиб, суд ишлари сунъий равишда кўпаймоқда.

Яна бир жиддий муаммо – суд муҳокамаларида тақдим этилаётган ҳужжат ва далилларнинг етарли эмаслиги. Қарз қандай юзага келган, қандай хизмат кўрсатилган ёки қандай таъмирлаш ишлари амалга оширилгани ҳақида асосли маълумотлар кўп ҳолларда тақдим этилмаяпти. Бу эса суд қарорларининг холис ва адолатли чиқарилишига тўсқинлик қилмоқда.

Тадбир давомида прокуратура ва қурилиш соҳаси вакиллари ҳам сўзга чиқиб, бошқарув компаниялари фаолиятида шаффофликни таъминлаш, мулкдорлар билан муносабатларда ҳуқуқий маданиятни юксалтириш, ҳамкорликни мустаҳкамлаш зарурлигини қайд этдилар.

Семинарда иштирокчилар судьялардан ўзларини қизиқтирган саволларга жавоб олдилар. Бу жараён фақат мулоқот билан чекланиб қолмай, муаммоларга ечим топишга қаратилган конструктив фикр алмашинуви тарзида кечди. Яъни иштирокчилар муаммонинг илдизигача етиб бориш, аниқ таклиф ва тавсиялар билдириш орқали амалда фойдали натижаларга йўналтирилган мулоқот олиб боришди.

Аммо шуниси аёнки, бундай учрашувлар маълум муддатгача фойда беради, тўлиқ тизимли ўзгаришларни эса самарали назорат ва қатъий масъулиятсиз тасаввур этиб бўлмайди.

Амалий аҳамиятга эга ушбу семинар, шубҳасиз, бошқарув компаниялари ва мулкдорлар ўртасидаги муносабатларда ҳуқуқий ёндашувни мустаҳкамлашга хизмат қилади. Аммо кўтарилган масалалардан кўриниб турибдики, бу борада ҳали ечилмаган муаммолар етарлича.