Ma’lumki, g‘o‘za parvarishi bo‘yicha 1 iyuldan 31 avgustgacha “G‘o‘zada kafolatli hosil yaratish zarbdor 60 kunlik” e’lon qilingan. Bu borada Namangan viloyatining Uychi tumanidagi “Mashad sohibkori” fermer xo‘jaligida namunali ish tashkil etilmoqda.

Xo‘jalikning 35 gektar maydonida paxtaning xorijiy navi yetishtirilayotir. Hozirga qadar 9 marta kultivatsiya, 6 marta sajan preparati bilan bargidan oziqlantirish, 2 marta chizellash, 3 marta o‘g‘itlash ishlari olib borildi. Gektariga 1400 kilogrammdan fosforli, kaliyli, azotli o‘g‘itlar bilan oziqlantirildi, yaxob bilan birga 3 marta sug‘orildi.

Tumandagi  “Qumtepa niholi”, “Sohibi ziyo nur saxovati”, “Barnogul ziyo fayz”, “Ergashboy ota” fermer xo‘jaliklarida g‘o‘za parvarishi avjida.

Tumanda shuningdek, aholining chorvachilik, parrandachilik mahsulotlariga bo‘lgan talabini qondirish borasida tizimli ishlar amalga oshirilmoqda.

Mashadlik tadbirkor Sobitxon Turg‘unov chorvachilik bilan shug‘ullanadi. Hozirda oilaning chorvachilik fermasida 80 bosh qoramol bo‘rdoqiga boqilib, xalqimizning go‘sht mahsulotiga bo‘lgan talabi qondirib kelinmoqda.

O‘nhayatlik tadbirkor Shavkat Bobomirzayev esa uy sharoitida parrandachilikni yo‘lga qo‘yib, hozirda 20 ming bosh broylerni parvarishlamoqda. U yil davomida aholi dasturxoni uchun jami 100 tonnagacha go‘sht yetishtirmoqda.  

Viloyat hokimi Shavkat Abdurazzoqov oziq-ovqat xavfsizligi, narx-navo barqarorligini ta’minlashga hissa qo‘shayotgan tadbirkorlar bilan muloqotda bo‘lib, ularning istiqboldagi rejalari bilan tanishdi, yangi ish o‘rinlari yaratish bo‘yicha mutasaddilarga ko‘rsatmalar berdi.

Viloyat rahbari boshchiligidagi ishchi guruh tumanining Gulbog‘ MFY hududida joylashgan 46-davlat maktabgacha ta’lim tashkilotida ham o‘rganish olib borib, 3 milliard 600 million so‘m mablag‘ evaziga 120 o‘rinli yangi bino qurilishi bilan tanishdi.  

Viloyati hokimi shuningdek, Uychi tumanidagi Xizirobod mahallasida fuqarolar bilan sayyor qabul o‘tkazdi.  

Qabulda fuqarolarning kadastr, salomatlikni tiklash, uy-joy, yo‘l ajratish, moddiy yordam olish, nogironlikni belgilash kabi mavzulardagi murojaatlari o‘rganilib, yechimi bo‘yicha mutasaddi idoralar rahbarlariga topshiriq hamda ko‘rsatmalar berildi, ijrosi nazoratga olindi.