Buxoro viloyati bojxona boshqarmasi boshlig‘i B.Muratov tadbirkorlik sub’ektlari va tashqi iqtisodiy faoliyat qatnashchilari uchun sayyor qabul o‘tkazdi.

Sayyor qabul davomida tadbirkorlar tomonidan “Bojxona hududida qayta ishlash” rejimidan foydalanishni yo‘lga qo‘yish tartibi, bojxona to‘lovlarini kechiktirib yoki bo‘lib to‘lash imkoniyatlari, shuningdek, xorijdan texnologik asbob-uskunalarni olib kirishda bojxona rasmiylashtiruvi va to‘lovlarga oid mavzularda murojaatlar bildirildi.

E’tiborlisi, bojxona organi mas’ullari har bir murojaatchiga individual yondashib, ularga huquqiy tushuntirishlar berdi.  Bu esa tizimda ochiqlik, xizmatga tayyorlik va “Bojxonachi xalqqa va tadbirkorga yordamchi” tamoyili ustuvor ekanini yana bir bor namoyon etdi.

Tadbir davomida aniqlangan taklif va tavsiyalar asosida kelgusida bojxona tizimining yanada takomillashuvi, qonunchilikdagi yengilliklarning to‘g‘ri qo‘llanishi va tadbirkorlar bilan samarali hamkorlikning yo‘lga qo‘yilishi yuzasidan muhim xulosalar chiqarildi.

Xuddi shunday ochiq sayyor qabul viloyat bojxona boshqarmasi boshlig‘i o‘rinbosari N.Osmanov rahbarligida ham o‘tkazildi. Unda tadbirkorlik sub’ektlari va tashqi iqtisodiy faoliyat vakillari qatnashdi.

 Mazkur ochiq muloqot shaklidagi uchrashuv muammolarni joyida tinglash, ularni tezkor hal etish va amaliy yordam ko‘rsatish maqsad qilingan bo‘lib, tadbirkorlar ko‘plab masalalarda o‘zlarini qiynayotgan savollarga javob topish imkoniga ega bo‘ldi.

Uchrashuv davomida bojxona sohasi mutasaddilari nafaqat murojaatlarga yechim topdi, balki ishtirokchilarni bojxona qonunchiligidagi so‘nggi o‘zgarishlar bilan ham tanishtirdi. Jumladan, Prezidentning “Ishlab chiqarish, eksport va tadbirkorlik faoliyatini rag‘batlantirish, savdo va sanoat siyosati samaradorligini oshirish chora-tadbirlari to‘g‘risida”gi farmoni mazmun-mohiyati tushuntirilib, uning amaliy ahamiyatiga urg‘u berildi.