Xovos tumani Qahramon mahallasida tuman fuqarolari uchun sayyor qabul tashkil etildi. Unda Sirdaryo viloyati hokimi vazifasini bajaruvchi E. Turdimov , viloyat prokurori, ichki ishlar boshqarmasi boshlig‘i, Xalq qabulxonasi mudiri, tuman hokimi hamda mutasaddi tashkilot va idoralar xodimlari ishtirok etdi va fuqarolarning muammolari birma-bir tinglandi va ularga yechim topish choralari ko‘rildi.

Qabulga asosan tumanning Binokor, Qahramon, Husniobod va Bo‘ston mahallalari fuqarolari tashrif buyurdi. Ularning umumiy sonlari 117 nafar bo‘lib, ular tomonidan turli muammoli masalalar ko‘tarildi. Asosiy murojaatlar bepul uy-joy ajratish, noqonuniy qurilishlarni bartaraf etish, moddiy yordam berish, yo‘l va ichimlik suvi ta’minoti bilan bog‘liq muammolarni tashkil etdi.

Sayyor qabul davomida kelib tushgan murojaatlarga joyida tegishli tushuntirishlar berildi. Ayrim masalalar viloyat hokimligi nazoratiga olinib, atroflicha o‘rganilishi uchun ko‘rsatmalar berildi. Qonunga zid bo‘lgan ba’zi talablar esa joyida rad etildi.

Murojaatchilar ta’kidlashlaricha, bunday sayyor qabullar turli idoralarga borib yurish zaruratini kamaytirib, fuqarolarga mas’ul rahbarlar bilan bevosita muloqot qilish imkoniyatini beradi.

Qabul yakunida viloyat darajasida ishchi guruh tuzilib, hududda obodonlashtirish, bunyodkorlik va aholi uchun qulayliklar yaratish bo‘yicha amaliy ishlar tashkil etilishi belgilab olindi.