Qashqadaryo viloyatida kichik va o‘rta biznesni rivojlantirishga yo‘naltirilgan tadbirlar davom etmoqda.

Viloyat soliq boshqarmasi tomonidan tadbirkorlar faoliyatidagi muammolarni aniqlash va ularga yechim topish maqsadida ochiq muloqotlar tashkil etilmoqda. Navbatdagi uchrashuv Muborak tumanida o‘tkazildi.

Viloyat soliq boshqarmasi boshlig‘i Sirojiddin Eshmatov ishtirokida o‘tgan uchrashuvda tadbirkorlar soliq hisobotlarini topshirish, imtiyozlardan foydalanish va boshqa dolzarb masalalarni muhokama qilishdi. Ayrim murojaatlar shu yerda hal etilgan bo‘lsa, ayrimlari vaqt va o‘rganish talab qilib, aniq muddat va mas’ullar belgilab olindi.

Muborak tumanidagi “Muborak konkret” mas’uliyati cheklangan jamiyati vakili Boytura Sobirov qishloq xo‘jaligi yeri bilan bog‘liq muammolarni ko‘tarib, soliqlarning ortiqcha hisoblanganini bildirdi. Mazkur masala bo‘yicha amaliy yordam ko‘rsatish uchun topshiriqlar berildi.

Uchrashuv so‘nggida soliq qonunchiligidagi yangiliklar va imtiyozlar haqida ma’lumotlar berildi, ishtirokchilarning savollariga javob qaytarildi.