Bugungi kunda mamlakatimiz iqtisodiyot hajmining yarmidan ko‘pi, sanoat va eksportning uchdan bir qismi aynan kichik va o‘rta biznes vakillari hissasiga to‘g‘ri kelmoqda. Mazkur yo‘nalishda faoliyat yuritayotgan tadbirkorlar safini yanada kengaytirish, zarur sharoitlar yaratish maqsadida ular ishtirokida ochiq muloqotlar o‘tkazilmoqda.

Xususan, Toshkent viloyati soliq boshqarmasi rahbariyati tomonidan Bekobod tumanida kichik va o‘rta biznes vakillari bilan navbatdagi uchrashuv o‘tkazildi. Tadbirda Prezidentimizning joriy yil 19 martdagi “Kichik va o‘rta biznesning iqtisodiyotdagi o‘rnini oshirish chora-tadbirlari to‘g‘risida”gi farmoniga muvofiq berilayotgan imkoniyatlar to‘g‘risida atroflicha ma’lumot berildi. 

Shu bilan birga, tadbirkorlik sub’ektlarining soliq hisobotlari taqdim etilishi, qo‘shilgan qiymat solig‘i o‘rnini qoplash, yer va mol-mulk soliqlarini hisoblanishi, ma’muriy huquqbuzarliklar bilan bog‘liq muammo va takliflar tinglanib, ijobiy hal etish choralari ko‘rildi. 

Xususan, tuman hududidagi “Havas Bunyodkor” mas’uliyati cheklangan jamiyat rahbari tomonidan tegishli bo‘lganlik qurilish osti maydonini egallagan noturar ob’ekti soliq bazasi va bostirma egallagan maydonga qanday tartibda soliq hisoblanishi yuzasidan murojaat qildi. Mazkur murojaatga mutaxassislar tomonidan qonuniy tartibda javob berildi. 

Shuningdek, tadbirkorlar murojaatlari yuzasidan mas’ul tashkilot hamda soha mutaxassislari tomonlaridan nazoratga olindi. Uchrashuv savol-javoblar bilan qiziqarli tarzda o‘tkazildi.