Xiva tumanida Xorazm viloyati hokimi Jo‘rabek Rahimovning navbatdagi sayyor qabuli o‘tkazildi.

Qabul davomida 50 nafardan ortiq fuqarolarning ijtimoiy-maishiy masalalar yuzasidan talab va takliflari, ariza va shikoyatlari o‘rganildi. Mavjud muammolarning aksariyati daxldor idoralar, tuman va shahar hokimliklari vakillari ishtirokida hal etildi.  

– Mamlakatimizda inson qadrini ulug‘lash, xalqning dardu tashvishlarini o‘z vaqtida o‘rganib, ijobiy hal etish ustuvor ahamiyatga aylanib ulgurdi, – deydi murojaatchi Komiljon Otajonov. – 2021 yilda Hazorasp tuman hokimi qaroriga asosan menga mini futbol maydonchasi va do‘kon qurish uchun yer ajratilgan edi. 2024 yilda tuman prokurori ushbu qarorni noqonuniy deb topib, protest kirgizdi. Shundan so‘ng men ham tuman hokimligini sudga berdim. Sud mening foydamga 277 million so‘m konpensatsiya mablagi undirishni belgilab berdi. Bugun viloyat hokimi ushbu pulni ikkinchi kvartalda viloyat hokimligi tomonidan to‘lab berishni bildirdi.

Muloqot davomida ko‘plab fuqarolarga ularni qiziqtirayotgan masalalar bo‘yicha huquqiy tushuntirish va maslahatlar berildi.  

Qabulda murojaatlarni qonun doirasida belgilangan muddatlarda o‘rganib, ijobiy hal etish bo‘yicha viloyat hokimining o‘rinbosarlari, viloyat tashkilotlari rahbarlari hamda tumanlar hokimlariga vazifalar belgilab berildi.