O‘tgan yilning avgust oyida qabul qilingan “O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida”gi qonun va uning ijrosi doirasida hududlarda boshlangan xatlov jarayonlari hamda undan keyingi jarayonlar ko‘pchilikda tushunmovchilik, e’tirozlar uyg‘otmoqda.

Bu boradagi murojaatlarning ko‘pligini hisobga olib, Kadastr agentligi direktori o‘rinbosari Abdushukur Abdullayev Qashqadaryo viloyatining Qarshi tumanida bo‘lib, fuqarolarning kadastr masalalariga oid murojaatlarini tingladi. 

Sayyor qabulda huquqbuzarlik uchun qo‘llanilgan jarima, ortiqcha egallab olingan yerlar, noqonuniy qurilish, uy-joyga egalik huquqini olish masalalarida yo‘llangan 20 ga murojaat ko‘rib chiqilib, ularning 5 tasiga huquqiy tushunchalar berildi. O‘rganish uchun ma’lum vaqt talab etadigan murojaatlar qonuniy ko‘rib chiqish uchun qabul qilindi.

Shuningdek, hududlarda amalga oshirilayotgan xatlov ishlari, qonun asosida huquqlarni e’tirof etish jarayonlari, shartlari, bosqichlari hamda tartibi haqida batafsil tushunchalar berildi.

Sayyor qabul yakunida ishtirokchilarning murojaatlarini belgilangan muddatlarda o‘rganib, topshiriqlarning bajarilishi nazoratga olindi.