Ўтган йилнинг август ойида қабул қилинган “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонун ва унинг ижроси доирасида ҳудудларда бошланган хатлов жараёнлари ҳамда ундан кейинги жараёнлар кўпчиликда тушунмовчилик, эътирозлар уйғотмоқда.

Бу борадаги мурожаатларнинг кўплигини ҳисобга олиб, Кадастр агентлиги директори ўринбосари Абдушукур Абдуллаев Қашқадарё вилоятининг Қарши туманида бўлиб, фуқароларнинг кадастр масалаларига оид мурожаатларини тинглади. 

Сайёр қабулда ҳуқуқбузарлик учун қўлланилган жарима, ортиқча эгаллаб олинган ерлар, ноқонуний қурилиш, уй-жойга эгалик ҳуқуқини олиш масалаларида йўлланган 20 га мурожаат кўриб чиқилиб, уларнинг 5 тасига ҳуқуқий тушунчалар берилди. Ўрганиш учун маълум вақт талаб этадиган мурожаатлар қонуний кўриб чиқиш учун қабул қилинди.

Шунингдек, ҳудудларда амалга оширилаётган хатлов ишлари, қонун асосида ҳуқуқларни эътироф этиш жараёнлари, шартлари, босқичлари ҳамда тартиби ҳақида батафсил тушунчалар берилди.

Сайёр қабул якунида иштирокчиларнинг мурожаатларини белгиланган муддатларда ўрганиб, топшириқларнинг бажарилиши назоратга олинди.