Tahlillarga ko‘ra, Toshkent viloyatida o‘tgan yil barcha tuman-shahar Davlat xizmatlari markazlari orqali aholiga 1 million 442 ming 494 ta davlat xizmatlari ko‘rsatilgan. Shundan 606 ming 30 tasi jismoniy va yuridik shaxslar tomonidan mustaqil ravishda Yagona interaktiv davlat xizmatlari portali my.gov.uz orqali yuborilgan.

Yil yakuniga ko‘ra, 6 ta tuman va shahar Davlat xizmatlari markazi orqali eng ko‘p davlat xizmatlari ko‘rsatildi. Jumladan, Angren, Olmaliq, Chirchiq shaharlari, Zangiota, Qibray va O‘rta Chirchiq tuman DXMda ko‘proq bo‘lgan. 

– 2024 yilda davlat ro‘yxatidan o‘tgan tadbirkorlik sub’ektlari soni 26 489 tani tashkil etgan bo‘lsa, shundan, 6 068 tasi yuridik shaxslar, 20 421 tasi yuridik shaxs bo‘lmagan tadbirkorlik sub’ektlaridir, – deydi Toshkent viloyati adliya boshqarmasi sho‘’ba mudiri Xurshid Pirnazarov. – DXMlar orqali 39 ta Xorijiy investitsiya ishtirokidagi korxonalar davlat ro‘yxatidan o‘tdi. Ayniqsa, olis, chekka hududlarda istiqomat qiluvchi aholining davlat xizmatlariga bo‘lgan talab va ehtiyojini qondirish maqsadida muntazam sayyor davlat xizmatlari ko‘rsatilmoqda. Joriy yilda ham bu boradagi sa’y-harakatlarni samarali tashkil etish rejalashtirilgan. 

Shu kunlarda “Huquqiy mahalla” loyihasi doirasida soha mutaxassislari joylarda “mahalla yettiligi” a’zolari hamkorligida targ‘ibot tadbirlari olib bormoqda. Unda fuqarolarning kundalik hayotidagi muammolari ko‘rib chiqilib, “Huquqiy mahalla” platformasiga kiritilmoqda. Mavjud muammolarni bartaraf etish yuzasidan esa choralar belgilanib, ish yurituviga olinmoqda.