Hozirda barcha hududlarda og‘ir sharoitda yashayotgan oilalarni har tomonlama qo‘llab-quvvatlash, daromad manbaini yaratib berish, tibbiy xizmat, davolanishga bo‘lgan ehtiyojini qondirish, yashash sharoitlarini yaxshilashga alohida e’tibor qaratilmoqda.

Xususan, Buxoro viloyati Kogon tumanida ham mavjud 23 ta mahalla fuqarolar yig‘inida ijtimoiy qiyin ahvoldagi opa-singillarni qo‘llab-quvvatlash, “Ayollar daftari”ga kiritilganlar uchun qulay daromad manbalari yaratish hamda ko‘mak berishga ahamiyat qaratilmoqda.  

“Ayollar daftari”ning boquvchisi bo‘lmagan xotin-qizlar, ijtimoiy yordamga muhtoj birinchi va ikkinchi guruh nogironligi bo‘lgan, shuningdek, tezkor tibbiy muolajaga muhtoj xotin-qizlar toifalariga mansub, uy-joy ta’miriga ko‘mak so‘ragan ayollarning 5 nafariga madad yordami ko‘rsatildi. Uylarning tom qismini ta’mirlash maqsadida “Ayollar daftari” jamg‘armasi hisobidan har bir ta’mirtalab turar joy uchun 45 donadan shifer, taxta va mix mahsuloti yetkazilgani xonadon bekalarini mamnun qildi.  

Jumladan, “Tuniroq” mahalla fuqarolar yig‘inida yashovchi Gulixon Husenova, “Xo‘ja yakshaba” mahalla fuqarolar yig‘inida yashovchi Manzura Mansurova, “Navruz” mahalla fuqarolar yig‘inida yashovchi Nazira Niyozqulova, “Bahouddin Naqshband” mahalla fuqarolar yig‘inida yashovchi Rohila Qurbonova, “O‘zbekiston” mahalla fuqarolar yig‘inida yashovchi Mukarram Jo‘rayeva ana shunday e’tibor va rag‘batdan bahramand bo‘ldi.  

– Turar joyimiz tomi shifer qilinmagani sababli ko‘p yillardan buyon yog‘ingarchilik paytlari tomdan chakki o‘tib, tashvishga qolardik, – deydi Mukarram Jo‘rayeva. – Nihoyat, mahallamizdagi va boshqa mas’ullar yashash sharoitimni ko‘rganidan so‘ng, nochor paytimizda bizga madadkor bo‘lishmoqda. Uyimizni ta’mirlashga yaqindan yordam berayotganlarga katta rahmat.