Davlatimiz rahbari topshirig‘iga asosan Prezident Xalq qabulxonasi boshchiligida Davlat boshqaruvi, Huquqni muhofaza qilish, Ichki ishlar vazirligi akademiyalari, Jamoat xavfsizligi universiteti, Qoraqalpog‘iston Respublikasi Vazirlar Kengashi bilan mahallalarda kambag‘allik va ishsizlikni qisqartirish, jinoyatchilikni kamaytirish mavzusida o‘quv-amaliy seminarlar tashkil etilmoqda.

Orolbo‘yidagi 16 ta tuman-shahar sektorlari rahbarlari va 400 dan ziyod mahalla «yettilik»lari ishtirok etayotgan seminarlardan asosiy maqsad – aholi muammolarini o‘rganish va hal etish, sektorlar rahbarlari va «mahalla yettilik»lari faoliyati samaradorligini yanada oshirishdan iborat.

Murojaatlar bilan ishlash, ariza-shikoyatlarga sabab bo‘layotgan omillarni aniqlash va hal qilish seminarlarning asosiy mavzularidan biri bo‘ldi. Prezident virtual va Xalq qabulxonalariga joriy yilning yarmida Orolbo‘yi aholisidan 31 mingdan ortiq murojaat kelib tushgan bo‘lsa, ularning qariyb 20 mingdan ziyodi qanoatlantirilgan.  

Murojaatlarning katta qismi moddiy yordam ajratish masalasida ekani ham aholi bandligini ta’minlash, daromadini oshirishni taqozo etadi. Shu bois mazkur seminarlar Sayxunobod, Uychi, G‘ijduvon tajribalari asosida hududlarni sanoatlashtirish, aholi bandligini ta’minlash, kam daromadli xonadonlarga 7 xil loyiha paketlarini taqdim qilish, «mijozbay» ishlash mexanizmini joriy etish orqali banklar faoliyatini jonlantirish kabi mavzularni qamradi.  

Shuningdek, «mahalla byudjeti»ni shakllantirib, samarali boshqarish, sektor rahbarlari, «mahalla yettilik»lari faoliyatining samaradorligi xususida so‘z bordi.

Nazariy mashg‘ulotlar o‘z o‘rnida amaliyot bilan uyg‘un olib borildi. Deylik, Taxtako‘pirning Dovqara, Xo‘jaylidagi Kun nuri, Beruniy tumanining Bunyodkor, Sarkop kabi mahallalaridagi muloqotlarda mazkur hududlardagi ariza-shikoyatlarga sabab bo‘layotgan masalalar joyida aniqlanib, sektorlar rahbarlari va «mahalla yettilik»lari bilan birga ularni bartaraf etish bo‘yicha chora-tadbirlar belgilandi.

Bu kabi o‘quv-amaliy seminarlar boshqa viloyatlarda ham tashkil qilindi. Natijada ularda jami 51 tuman-shahar sektorlari rahbarlari va 1 960 ta «mahalla yettilik»lari qamrab olindi.