Prezident Xalq qabulxonasining «Murojaatdan – daromadga» loyihasi Buxoro viloyati Shofirkon tumanida katta festivalga aylandi.

Erta tongdan tuman markazida o‘tkazilgan sog‘lom hayot uchun «5000 qadam» yurish marafoni Yoshlar bog‘idagi turli ko‘rgazmalaru kitobxonlik anjumaniga, yosh rassomlar uchun mahorat darslariyu harbiy-vatanparvarlik dasturlariga, sport musobaqalariyu aholi daromadini oshirish yo‘lidagi ezgu amallarga ulanib ketdi. Barchasi o‘zaro uyg‘unlikda viloyatni kambag‘allik, ishsizlik va jinoyatdan xoli hududga aylantirish borasidagi «Buxoro tajribasi»ni yaratishga xizmat qiladi.

Bu jarayonda Prezident maslahatchisi o‘rinbosari – Xalq qabulxonasi rahbari Ulug‘bek Muhammadiyev boshchiligidagi Respublika ishchi guruhi tomonidan moddiy yordam masalasida murojaat qilgan shofirkonlik 115 nafar xotin-qizga sektor rahbarlari bilan birga subsidiya hisobidan o‘n turga yaqin ish anjomlari topshirildi. Tikuv mashinalari, sut, go‘sht va sabzavotlarni qayta ishlash uskunalari olib berilgan har bir murojaatchi o‘z hududida shu yo‘nalishdagi lider tadbirkorlarga biriktirildi. Bu esa aholi daromadini oshirish, bu boradagi murojaatlarga samarali yechim topishning yana bir xalqchil mexanizmidir.

Masalan, «Qalmaqon» mahallasida yashovchi tadbirkor Oynisa Sharipova ham bugun Mohira Ikromova kabi subsidiyaga uskuna olib ish boshlagan to‘rt nafar mahalladoshi bilan kooperatsiya tashkil qildi. To‘rt ayol o‘z uyida yarim tayyor oziq-ovqat mahsulotlari ishlab chiqarsa, tadbirkor ularni sotib olib, iste’molchilarga yetkazib beradi. Bundan esa barcha birdek manfaatdor.

"Denov" mahallasida yashovchi Nodira Karimova ham bugun mahallasidagi tadbirkor bilan birikib, subsidiyaga olingan separatorda sutni qayta ishlab, qaymoq, sariyog‘ olishni boshladi. Bu bilan oila byudjeti uchun yana bir daromad manbai yaratildi.

Tuman markazidagi Yoshlar bog‘i anchagacha gavjum bo‘ldi. Mehnat yarmarkalari, kasb-hunar o‘rganish, oliy ta’lim, sog‘lom ovqatlanish kabi yo‘nalishlardagi ko‘rgazmalarda aholining barcha qatlami, ayniqsa, ishsiz xotin-qizlar mehnat qilib, jamiyatning faol a’zosiga aylanishi uchun keng miqyosda ma’lumotlar, maslahat va ko‘mak olish imkoniga ega bo‘ldi. Buxoro shahridan kelgan tajribali shifokorlar 470 nafardan ziyod aholini tibbiy ko‘rikdan o‘tkazdi.  

«Buxoro tajribasi» – sadoqat namunasi» tamoyili asosidagi bunday tadbirlar viloyatning boshqa hududlarida ham tashkil etilyapti.