Yangi Namangan tumanida joylashgan Mudofaa ishlari boshqarmasi huzuridagi Chaqiriluvchilarni harbiy texnika mutaxassisliklar bo‘yicha tayyorlash markazida 9-may – Xotira va qadrlash kuni munosabati bilan “Yurt tinchligi – bebaho ne’mat” shiori ostida “Uch avlod uchrashuvi” o‘tkazildi.

Tadbir doirasida mard o‘g‘lonlarning ko‘rgazmali chiqishlari, milliy mahsulotlar namoyishi, bo‘sh ish o‘rinlari mehnat yarmarkasi va “Zakovat” intellektual o‘yini tashkil etildi.

“Ustoz-shogird” an’analarini uyg‘unlashtirish, keksalarning boy tajribasini yosh avlodga ulashish maqsadida qaratilgan uchrashuvda ko‘p yillik hayot tajribasiga ega faxriylar, jamiyat rivojiga munosib ulush qo‘shayotgan o‘rta yosh avlod vakillari hamda shijoatli, iqtidorli yoshlar o‘zaro fikr almashdi, dildan suhbat qurdi.  

Bu kabi tadbirlar yoshlarga ma’naviy ozuqa ulashish bilan bir qatorda, uch avlod vakillarining o‘zaro hamkorlik aloqalarini mustahkamlashga xizmat qiladi.