Namanganda Bosh prokuratura huzuridagi Majburiy ijro byurosi viloyat boshqarmasi boshlig‘i Bekzod Mirzaahmedov tomonidan bevosita shahar, tumanlarda yuridik va jismoniy shaxslar uchun qabullar o‘tkazib kelinmoqda. Ana shunday sayyor qabulning navbatdagisi Pop tumanida o‘tkazildi.

Aynan Byuroning tuman bo‘limida bo‘lib o‘tgan qabulda sakkiz nafar fuqarodan aliment, zarar, bank, majburiyat yuklash bilan bog‘liq masalalar yuzasidan murojaatlar qabul qilindi. Murojaatlarni o‘rganish uchun vaqt talab qilingani sababli MIB viloyat boshqarmasi tarkibiy tarmoqlar va davlat ijrochilariga, mas’ullarga qisqa muddat ichida hal etish yuzasidan ko‘rsatma berildi.  

Shuningdek, Byuroning Namangan shahri va tumanlar bo‘limlari rahbarlari tomonidan ham sektorlardagi belgilangan 13 ta mahalla fuqarolar yig‘inida ham sayyor qabul o‘tkazilib, ularda aholi tomonidan ko‘tarilgan masalalarni o‘rganilgan holda hal etish choralari ko‘rildi.  

– Byuroning viloyat boshqarmasi hamda uning shahar va tumanlar bo‘limlari tomonidan fuqarolar tomonidan yo‘llanayotgan murojaatlar bilan ishlash, ularga yechim topish maqsadida tizimli chora-tadbirlar ko‘rilmoqda, – deydi MIB Namangan viloyati boshqarmasi katta inspektori Muzaffar Mamatqulov. – Aynan murojaatlarni joyida hal qilish, takroriy arizalarni tahlil etish hamda ularga yechim topish, fuqarolarga qulay bo‘lish maqsadida haftaning har shanbasida joylarda sayyor qabullar tashkil etilmoqda.