Sirdaryo viloyati hokimi Akmaljon Mahmudaliyev Toshkent kimyo-texnologiya instituti Yangiyer filiali talabalari bilan uchrashdi.

Ochiq va samimiy ruhda kechgan muloqotda viloyat hokimi o‘z tajribasidan kelib chiqib, talabalarga oliy o‘quv yurtida egallagan bilimlarini kelgusidagi kasbiy faoliyatda to‘g‘ri qo‘llash bo‘yicha muhim tavsiya va maslahatlarini berdi.

Yigit-qizlarning fikr-mulohazalari, istak va kelajak rejalari eshitilib, barcha taklif va tashabbuslari qo‘llab-quvvatlandi. Viloyat hokimi har chorakda bir marotaba yuqori bosqich talabalariga dars o‘tadigan bo‘ldi.

– Viloyat rahbarining talabalarga saboq berishi nafaqat yoshlar, balki biz o‘qituvchilarni ham ruhlantiradi, – deydi TKTI Yangiyer filiali direktori, professor Zafar Hakimov.  

Mazkur uchrashuv doirasida talabalarning ijodiy ishlari ko‘rgazmasi, ilmiy-texnikaviy ishlanmalar taqdimoti, “Zakovat” intellektual o‘yini va sport musobaqalari tashkil qilindi.  

Faol talabalarga Toshkent shahriga sayohat yo‘llanmasi, tashakkurnoma va kitoblar topshirildi. Shuningdek, hokim filial qoshida ochilgan “Yoshlar sanoat texnoparki” faoliyati bilan ham tanishdi.