Surxondaryo viloyatining Qiziriq tumanidagi Bog‘iston, Sho‘rchi tumanidagi Baxshtepa-1, Muzrabot tumanidagi Yakkatol, Oltinsoy tumanidagi To‘xtamish mahallalarida “Obod xonadon —obod ko‘cha —obod mahalla” mezonlari joriy etilib, keng qamrovli obodonlashtirish-qurilish, ko‘kalamzorlashtirish ishlari amalga oshirilmoqda.

Qiyofasi tubdan o‘zgarib, aholining munosib turmush kechirishi uchun barcha sharoit yaratilayotgan mazkur mahallalarda xalq bilan ochiq muloqotlar tashkil etilib, odamlarni qiynayotgan muammolar ham o‘rganilmoqda. 

Prezidentimizning Surxondaryo viloyatidagi Xalq qabulxonasi mudiri Abdulhakim Eshmuratov va viloyat soliq boshqarmasi boshlig‘i Erkin Narmanov Oltinsoy tumanidagi tog‘li To‘xtamish mahallasida bo‘lib, aholi uchun sayyor qabul o‘tkazdi.

Tumandagi sektorlar rahbarlari, korxona, tashkilot va muassasalar boshliqlari ishtirok etgan ochiq muloqotda To‘xtamish hamda Sohibkor mahallarida yashaydigan aholi dehqonchilik uchun oqova suv ta’minotini yaxshilash, yo‘llarni ta’mirlash, uy-joylarining kadastr hujjatlarini rasmiylashtirish, tomorqa va lalmi maydonlardan soliq undiruvi, tibbiy xizmat ko‘rsatish sifatini oshirish kabi masalalarni o‘rtaga tashladi. 

—Yuzma-yuz muloqot chog‘ida tushgan murojaatlarning aksariyati mahallani yanada obod va fayzli go‘shaga aylantirishga xizmat qiladi, —deydi Prezidentimizning Surxondaryo viloyatidagi Xalq qabulxonasi mudiri Abdulhakim Eshmuratov. —Buning uchun o‘rtaga tashlangan har bir murojaatni tegishliligi bo‘yicha mutasaddilar bilan atroflicha muhokama etib oldik. 

Ochiq muloqotda murojaatlarning bir qismi joyida hal etildi. Shuningdek, ayrim masalalarda huquqiy maslahat berildi. Yechimi vaqt talab etadigan murojaatlar bo‘yicha aniq muddat belgilanib, ijrosi qatiy nazoratga olindi.