Mahalla aholisini jinoyatchilik haqida xabardor qilish, huquqiy tarbiyani yo‘lga qo‘yishning samarali mexanizmlarini yaratish bo‘yicha Oliy sud raisi o‘rinbosari Ikrom Muslimov boshchiligidagi respublika ishchi guruhi Jizzax viloyatida bo‘ldi.

Ishchi guruh a’zolari Jizzax shahri hamda Jizzax viloyatining barcha tumanlaridagi jinoyatchilik soni oshgan mahallalarda fuqarolar bilan ochiq muloqotlar o‘tkazdi. Muloqotlarda tuman hokimi, mahalla raislari, hokim yordamchisi, xotin-qizlar masalalari  bo‘yicha maslahatchilar, yoshlar yetakchisi va profilaktika inspektorlari hamda yoshlar qatnashdi.  

Ishchi guruh a’zolari “qizil” hududga kirgan har bir mahalladagi fuqarolar bilan jinoyatchilikning oldini olish, jamoatchilik nazoratini kuchaytirish borasida suhbatlashib, aholining takliflarini ham eshitdi.  

Mahallalarda o‘tgan muloqotlarda faol bo‘lmagan yoshlar qatorida o‘z kasbining ustasi, yurtimiz va dunyo miqyosida chempion bo‘lgan sportchilar borligi ma’lum bo‘ldi. Biror foydali kasb bilan band bo‘lmagan yoshlarning qiziqishidan kelib chiqib, sportchilarga biriktirish, sport to‘garaklariga jalb etish masalalari ham belgilab olindi.  

Ishchi guruhning hududlardagi muloqotlarida jinoyatchilikka olib boradigan hech bir masala va jinoyat sodir etishi mumkin bo‘lgan har bir shaxs e’tibordan chetda qolmadi.