Buxoro viloyati Romitan tumanida kam ta’minlangan, ijtimoiy himoyaga muhtoj, boquvchisini yo‘qotgan, nogironligi bor oilalarni moddiy va ma’naviy qo‘llab-quvvatlashga alohida e’tibor qaratilmoqda.

Bu xayrli ishlar doirasida ehtiyojmand oilalar holidan xabar olinib, ularga moddiy ko‘mak ko‘rsatilmoqda.

Romitan tumani hokimi Umedjon Barnoyev tashabbusi bilan klaster va fermer xo‘jaliklar homiyligi asosida BST “Sluster Agrokompleks” MCHJga qarashli “Chelong‘u” paxta qabul qilish maskanida tumandagi “Temir daftar”, “Ayollar daftari”, “Yoshlar daftari” ro‘yxatida turuvchi ehtiyojmand, boquvchisini yo‘qotgan, ko‘makka muhtoj  375 nafar fuqarolarga bepul 150 kilogrammdan bug‘doy, 1 qop un hamda 10 donadan presslangan somon tarqatildi.

Jarayonlarda bevosita Buxoro viloyati hokimi Botir Zaripov boshchiligida sektor rahbarlari ham qatnashdi. Rahbarlar aholini yurtimizda keng nishonlanayotgan qurbon hayiti bilan tabrikladi. Yig‘ilgan aholi vakillari bilan suhbatlasharkan, viloyat rahbari bunday xayrli ishlar hali bardavom bo‘lishini hamda hech  kim e’tibordan chetda qolmasligini ta’kidladi.

Fuqarolar ham bunday g‘amxo‘rlik va davomli e’tibor, yurtimizdagi xalqchil islohotlardan mamnunligini bildirdi.

– Men “Ayollar daftari” ro‘yxatida turaman, – deydi Dilrabo G‘aybullayeva. – Bugun bizga 150 kilogramm bug‘doy, 1 qop un hamda 10 donadan presslangan somon berishdi. Ilohim, yurtimiz tinch, mamlakatimiz obod bo‘lsin. Dehqonlarimizning yetishtirayotgan oziq-ovqat mahsulotlari yanada mo‘l bo‘lsin. Ko‘rsatilayotgan bunday g‘amxo‘rlik uchun davlatimizdan behad minnatdormiz.  

– Men “Temir daftari” ro‘yxatiga kiritilganman, – deydi Nigina To‘xtayeva. – Ko‘rsatilgan bu yordam dasturxonimizni ancha vaqt obod qiladi. Juda xursandmiz oilamiz bilan. Inson uchun salomatlik va nondan aziz narsaning o‘zi yo‘q. Buning uchun ushbu ishlar boshida turgan insonlarga o‘z minnatdorchiligimni bildiraman.  

Tumanda ijtimoiy ko‘makka muhtoj oilalarni qo‘llab-quvvatlash tadbirlari davom etmoqda.