Jizzax viloyati Yangiobod tumanining barcha mahallalari, ayniqsa eng chekka qishloqlarida ham yangi ish o‘rinlari yaratishga alohida e’tibor qaratilmoqda.

Jumladan, xotin-qizlar bandligini ta’minlashga qaratilgan bir qator loyihalar amalga oshirilib, bu ishlarda tuman hokimi boshchiligida sektor rahbarlari, hokim yordamchilari va fuqarolar yig‘inlari mas’ullari birdek jon kuydirmoqda.

Ana shunday sa’y-harakatlar natijasida bugun tumanning chekka “Sarmich” mahalla fuqarolar yig‘inida yangi tikuv sexi ish boshladi. Yangiobod tumani hokimi Ibrohim Qarshiboyev yangi ochilgan tikuv sexiga borib, u yerda ishchilarga yaratilgan sharoitlar va ish jarayoni bilan tanishdi, yangidan ish boshlagan tikuvchi ayollar bilan suhbatlashdi.

– Davlatimiz rahbari joriy yil 10 fevral kuni viloyatimizga tashrifi chog‘ida xotin-qizlarni, ayniqsa eng chekka qishloqlarda istiqomat qilayotgan opa-singillarimizning har birini turli kasb-hunarlarga o‘rgatish, ular uchun bo‘sh ish o‘rinlari yaratishga alohida e’tibor qaratgani bejiz emas, – dedi Yangiobod tumani hokimi Ibrohim Qarshiboyev. – Chunki ayollarimiz hunarli bo‘lsa, uylarida xotirjamlik, ro‘zg‘orlarida baraka, oilaviy byudjetida daromad bo‘ladi.

Ushbu tikuv sexi 30 ta yangi va zamonaviy tikuv mashinalari bilan jihozlandi. Bu mahalladagi 50 nafar band bo‘lmagan xotin-qizlarni ish bilan ta’minlashga xizmat qildi.

Tuman hokimi tadbirkorlar va mahalla mas’ullari bilan suhbatlashar ekan, ushbu tikuv sexi faoliyatini yanada kengaytirish va ish o‘rinlari sonini 100 nafarga yetkazish bo‘yicha mutasaddilarga aniq ko‘rsatmalar berdi.