Fuqarolarning muammolarini hududlarga chiqib o‘rganish sinalgan usullardan bo‘lib, jamiyat va xalq farovonligi yo‘lida keng samara bermoqda.

Qoraqalpog‘iston Respublikasi Jo‘qorg‘i Kengesi Raisi Amanbay O‘rinboyev Nukus shahrining chekka hududlaridagi aholi bilan uchrashib, ularning talab va takliflariga quloq tutdi. Xususan shunday hududlardan biri bo‘lgan «Bestөbe» MFY fuqarolari bilan uchrashib, ularning turmushida uchrayotgan muammolarini tingladi, aholining yashash sharoitini o‘rgandi.

Jo‘qorg‘i Kenges Raisi hududda istiqomad qiluvchi Dilbar Sarsenbayeva, Gulara Qarjaubayeva, Zavrexan Yeshimova, Jaras Bodыmanov hamda boshqa fuqarolarning xonadonlarida bo‘lib,  ularga televizor, muzlatgich, oziq-ovqat mahsulotlarini ulashdi.  Shuningdek,  qo‘shimcha sovg‘alar topshirib, fuqarolarning uy-joylarini ta’mirlash uchun yordam berish, ya’ni uy tomlarini yopish,  isitish tizimini o‘rnatish bo‘yicha mas’ullarga aniq topshiriqlar berdi.  

Amanbay O‘rinboyevning aholi turmush tarzini o‘rganish, muammolarini bartaraf etish bo‘yicha hududlarga chiqishlari davom etadi,  deya xabar beradi Qoraqalpog‘iston Respublikasi Jo‘qorg‘i Kengesining Axborot xizmati.