Andijon viloyatidagi 887 ta mahalla fuqarolar yig‘inida istiqomat qilayotgan 63 ming nafar xotin-qiz “Ayollar daftari”ga kiritilgan. Oktyabr oyining birinchi yarmiga qadar ularning 58 ming 784 nafariga yordam ko‘rsatilgan.

O‘rganishlar, xotin-qizlar bilan o‘tkazilgan bevosita suhbatlar jarayonida “Ayollar daftari” ga kiritilgan 21 ming nafarga yaqin ayolning tibbiy himoya, salomatligi bilan bog‘liq muammolari borligi aniqlangan. Olib borilgan amaliy ishlar natijasida viloyat Sog‘liqni saqlash boshqarmasi va uning hududiy birlashmalari tomonidan “Ayollar daftari”ga kiritilgan tibbiy himoyaga muhtoj, ehtiyojmand 19 ming 944 nafar xotin-qizning muammolari hal etildi. 

Buning uchun qariyb 4 milliard 473 million so‘m mablag‘ sarflandi. Yordam ko‘rsatilgan xotin-qizlarning 3 ming 584 nafariga dori-darmonlar, 113 nafariga murakkab jarrohlik amaliyoti o‘tkazish uchun yo‘llanma, 736 nafariga tibbiyot muassasalarida davolanishi uchun yo‘llanma (order)lar berilgan. 142 nafari reabilitatsiya vositalari bilan ta’minlandi. Shuningdek, 166 nafariga respublikaning boshqa hududida joylashgan tibbiy muassasalariga borib kelish xarajatlari to‘lab berildi, 15 ming 203 nafariga esa turli tibbiy xizmatlar bo‘yicha yordamlar ko‘rsatildi. 

Bundan tashqari, “Ayollar daftari” ga kiritilgan 4 ming 183 nafar ehtiyojmand ayolning tibbiy himoyaga muhtoj farzandlarining muammolari hal etildi.

Umuman, viloyatda “Ayollar daftari”ga kiritilgan xotin-qizlarning tibbiy himoya, salomatligi bilan bog‘liq muammolarini bartaraf etishga qaratilgan ishlar izchil davom ettirilmoqda.