Toshkent viloyati Toshkent tumanida “Oqila ayollar” harakati a’zolari va “Ayollar daftari”da ro‘yxatida turuvchi xotin-qizlar bilan uchrashuv o‘tkazildi.

Tadbirda O‘zbekiston Respublikasi Bosh vaziri o‘rinbosari, Oila va xotin-qizlar davlat qo‘mitasi raisi Zulayxo Mahkamova, Toshkent viloyati hokimi o‘rinbosari Zuhra Mirgaziyeva, tumandagi mahallalarda faoliyat yuritayotgan xotin-qizlar faollari ishtirok etdi.  

Asosiy e’tibor joylarda ayollarning ijtimoiy faolligini oshirish, bandligini ta’minlash, tadbirkorlikka keng jalb etish, ehtiyojmand xotin-qizlarni ijtimoiy qo‘llab-quvvatlash, oila institutini mustahkamlash borasidagi ishlarni tizimlashtirish lozimligiga qaratildi. Bu jarayonda “Oqila ayollar” harakati ko‘magi bilan jamiyatda ezgu g‘oyalar, milliy qadriyatlar, urf-odatlar, muqaddas an’analarni singdirishga qaratilgan tizimli targ‘ibot-tashviqot ishlarini olib borish lozimligi ta’kidlandi. 

Uchrashuvda Toshkent tumanida “Ayollar daftari” ning 1-toifasidagi ijtimoiy himoyaga muhtoj ishsiz ayollarning 28 nafariga tikuv dastgohlari hamda 2 nafariga motokultivator subsidiya asosida berildi.  

Ma’lumot uchun hozir Toshkent tumanida xotin-qizlar muammolarini o‘rganish hamda ularni bartaraf etish va “Ayollar daftari” ni shakllantirish bo‘yicha xatlovda jami 41 ming 576 nafar xotin-qizning sharoiti o‘rganildi. Ularga ehtiyojlariga qarab 6 ta toifa asosida yordam ko‘rsatish belgilangan bo‘lib, tumandagi 68 ta mahallada jami 4 ming 62 nafar ayollar ehtiyojmand ahvolda ekani aniqlandi.