Тошкент вилояти Тошкент туманида “Оқила аёллар” ҳаракати аъзолари ва “Аёллар дафтари”да рўйхатида турувчи хотин-қизлар билан учрашув ўтказилди.

Тадбирда Ўзбекистон Республикаси Бош вазири ўринбосари, Оила ва хотин-қизлар давлат қўмитаси раиси Зулайхо Маҳкамова, Тошкент вилояти ҳокими ўринбосари Зуҳра Миргазиева, тумандаги маҳаллаларда фаолият юритаётган хотин-қизлар фаоллари иштирок этди.  

Асосий эътибор жойларда аёлларнинг ижтимоий фаоллигини ошириш, бандлигини таъминлаш, тадбиркорликка кенг жалб этиш, эҳтиёжманд хотин-қизларни ижтимоий қўллаб-қувватлаш, оила институтини мустаҳкамлаш борасидаги ишларни тизимлаштириш лозимлигига қаратилди. Бу жараёнда “Оқила аёллар” ҳаракати кўмаги билан жамиятда эзгу ғоялар, миллий қадриятлар, урф-одатлар, муқаддас анъаналарни сингдиришга қаратилган тизимли тарғибот-ташвиқот ишларини олиб бориш лозимлиги таъкидланди. 

Учрашувда Тошкент туманида “Аёллар дафтари” нинг 1-тоифасидаги ижтимоий ҳимояга муҳтож ишсиз аёлларнинг 28 нафарига тикув дастгоҳлари ҳамда 2 нафарига мотокультиватор субсидия асосида берилди.  

Маълумот учун ҳозир Тошкент туманида хотин-қизлар муаммоларини ўрганиш ҳамда уларни бартараф этиш ва “Аёллар дафтари” ни шакллантириш бўйича хатловда жами 41 минг 576 нафар хотин-қизнинг шароити ўрганилди. Уларга эҳтиёжларига қараб 6 та тоифа асосида ёрдам кўрсатиш белгиланган бўлиб, тумандаги 68 та маҳаллада жами 4 минг 62 нафар аёллар эҳтиёжманд аҳволда экани аниқланди.