Yangi uylarga yangi orzular bilan Sirdaryo viloyati Guliston shahrida 5 qavatli 8 ta uy foydalanishga topshirildi. 360 oila yangi xonadonga ega bo‘ldi.

Yangi uylar kalitini egalariga topshirish marosimida aholi uchun har tomonlama qulay sharoit yaratish va namunaviy loyihalar asosida yangi uy-joylar barpo etishga qaratilayotgan alohida e’tibor yuksak samaralar berayotgani ta’kidlandi. 

Viloyat markazidagi 5-mavzeda har birining loyiha qiymati 6 milliard 918 million so‘m bo‘lgan 5 qavatli 8 ta uyning har biri 1, 2 va 3 xonali 45 ta xonadondan iborat bo‘lib, jami 360 oilaga mo‘ljallangan. 

Nogironi bo‘lgan 7 oilaga ham yangi xonadonlar kaliti tantanali ravishda taqdim etildi. 

– Katta qizim bolaligidan nogiron, unga doimiy e’tibor zarurligi uchun doimo uydaman, – deydi Feruza Abdullaeva. – Turmush o‘rtog‘im, 3 nafar farzandim bilan bir xonali barakda ijarada turar edik. Xudoga ming shukr, Prezidentimiz qaroriga asosan namunaviy loyihalar asosida qurilgan ko‘p qavatli arzon uylardan 2 xonali xonadon oilamizga berildi. Yashash uchun barcha qulaylik yaratilgan, xonalar shinam, keng va yorug‘. Tabiiy gaz, elektr energiyasi, ichimlik suvi bor. 

Nogironi bo‘lgan oilalarga yangi uylar kaliti bilan birga hokimlik va homiy tashkilotlar tomonidan qimmatbaho uy jihozlari ham sovg‘a qilindi. Ushbu uylarning boshlang‘ich badali O‘zbekiston Xotin-qizlar qo‘mitasi qoshida tashkil etilgan jamoat fondi tomonidan to‘lab berilgani esa hammasidan quvonchli bo‘ldi. 

Milliy urf-odatlarimizga ko‘ra, Guliston shahar hokimligi tomonidan uy to‘yiga atab dasturxon yozildi, osh tortildi. San’atkorlar ijrosidagi kuy-qo‘shiqlar barchaning kayfiyatini yanada ko‘tardi. 

A.Qayumov, F.Toshmatov (surat), O‘zA