Keyingi yillarda mamlakatimizda barcha sohalarda o‘zgarishlar amalga oshirilmoqda, shahar va qishloqlarimiz qiyofasi tubdan o‘zgarib, bunyodkorlik ishlari olib borilmoqda.

Navoiy viloyatida ham qishloqlar, mahallalar qiyofasini tubdan yangilash va ijtimoiy-iqtisodiy infratuzilmani mustahkamlashga alohida e’tibor qaratilib, obod go‘shalar soni yil sayin ortib bormoqda.

Bunda “Obod qishloq” va “Obod mahalla” dasturlarining hayotga tadbiq etilishi natijasida hududlarning yo‘l-transport infratuzilmasi, muhandislik-kommunikatsiya tarmoqlari yangilanib, yangidan-yangi ijtimoiy soha ob’ektlari qurilmoqda.

Karmana tumani “Malik” mahallasidagi Uzumzor va Gulshan qo‘rg‘onlarida “Obod qishloq” dasturi doirasida dastlabki bunyodkorlik va obodonlashtirish ishlari boshlandi.

Aholi bilan tashkil etilgan uchrashuvda dastur doirasida Uzumzor va Gulshan qo‘rg‘onlarida amalga oshirilishi rejalashtirilgan ishlar haqida ma’lumot berilib, ushbu amaliy ishlarda mahalla ahlining ham faol bo‘lishi katta ahamiyatga ega ekanligi ta’kidlandi.

“Obod qishloq” dasturi doirasida jami 26 milliard 578 million so‘m mablag‘ ajratilgan bo‘lib, ichki yo‘llarni ta’mirlash, ichimlik suvi, elektr energiyasi, tabiiy gaz tarmoqlarini o‘tkazish, tungi yoritish chiroqlarini o‘rnatish, tibbiyot muassasasini rekonstruksiya qilish, mahalla guzari, maktab va maktabgacha ta’lim tashkiloti binolarini qurish va ta’mirlash ishlari olib boriladi.

bugungi kunda dastur doirasidagi keng ko‘lamli ishlar boshlab yuborilgan. Xususan, maxsus texnikalar yordamida ta’mir talab yo‘llarga qum, shag‘al yotqizilmoqda.

Shuningdek, malakali shifokorlar tomonidan aholi keng qamrovli chuqurlashtirilgan tibbiy ko‘rikdan o‘tkazilib, kasallik aniqlangan fuqarolarga shifoxonada davolanishlari uchun yo‘llanmalar berildi.