"Yangi O‘zbekiston – maktab ostonasidan, ta’lim-tarbiya tizimidan boshlanadi”, degan g‘oya asosida Farg‘ona viloyatidagi umumta’lim maktablarida ta’lim sifatini yaxshilashga muhim e’tibor qaratilmoqda.

Oltiariq tumani hokimi Shamsiddin Turdaliyev ta’lim muassasalaridagi shart-sharoitlar, o‘quv-tarbiyaviy jarayonlar, olib borilayotgan dars mashg‘ulotlari bilan yaqindan tanishmoqda. Bugun 3-matematika va fizika fanlariga ixtisoslashtirilgan davlat umumta’lim maktabida bo‘lib, o‘quvchilar bilan suhbatlashdi. 

Tuman hokimi o‘quvchilar bilan ularning kelajakdagi rejalari, tanlamoqchi bo‘lgan kasblari bo‘yicha muloqot qilib, darslarni yaxshi o‘zlashtirish, o‘z oldiga aniq maqsad qo‘yish va unga intilish kerakligini alohida ta’kidladi. 
Mazkur ta’lim maskanida aniq fanlarni o‘qitishda ilg‘or tajribalar yo‘lga qo‘yilgan. Shu bois o‘quvchilarning ham qiziqishi kuchli. 
- Maktabimizda barcha fanlardan to‘garaklar muntazam ravishda o‘tkazilib, o‘quvchilar o‘z bilimlarini mustahkamlab boradilar. Shuningdek, turli sport tadbirlari, musobaqalarda yoshlarimiz faol ishtirok etib, vatanparvarlik ruhida kamol topmoqdalar. Hozirda barcha joylarda bo‘lgani kabi maktabimizda ham “Yashil makon” loyihasi doirasi maktab hududi obodonlashtirilib, ming tupdan ortiq manzarali ko‘chatlar ekildi va bu ishlar jadallikda davom etmoqda,  – deydi maktab direktori Muhabbatxon Turdimatova.  

Shuningdek, tuman hokimi maktabda “Yashil makon” loyihasi doirasida amalga oshirilayotgan ishlarni ham ko‘zdan kechirdi.