"Янги Ўзбекистон – мактаб остонасидан, таълим-тарбия тизимидан бошланади”, деган ғоя асосида Фарғона вилоятидаги умумтаълим мактабларида таълим сифатини яхшилашга муҳим эътибор қаратилмоқда.

Олтиариқ тумани ҳокими Шамсиддин Турдалиев таълим муассасаларидаги шарт-шароитлар, ўқув-тарбиявий жараёнлар, олиб борилаётган дарс машғулотлари билан яқиндан танишмоқда. Бугун 3-математика ва физика фанларига ихтисослаштирилган давлат умумтаълим мактабида бўлиб, ўқувчилар билан суҳбатлашди. 

Туман ҳокими ўқувчилар билан уларнинг келажакдаги режалари, танламоқчи бўлган касблари бўйича мулоқот қилиб, дарсларни яхши ўзлаштириш, ўз олдига аниқ мақсад қўйиш ва унга интилиш кераклигини алоҳида таъкидлади. 

Мазкур таълим масканида аниқ фанларни ўқитишда илғор тажрибалар йўлга қўйилган. Шу боис ўқувчиларнинг ҳам қизиқиши кучли. 
- Мактабимизда барча фанлардан тўгараклар мунтазам равишда ўтказилиб, ўқувчилар ўз билимларини мустаҳкамлаб борадилар. Шунингдек, турли спорт тадбирлари, мусобақаларда ёшларимиз фаол иштирок этиб, ватанпарварлик руҳида камол топмоқдалар. Ҳозирда барча жойларда бўлгани каби мактабимизда ҳам “Яшил макон” лойиҳаси доираси мактаб ҳудуди ободонлаштирилиб, минг тупдан ортиқ манзарали кўчатлар экилди ва бу ишлар жадалликда давом этмоқда,  – дейди мактаб директори Муҳаббатхон Турдиматова.  

Шунингдек, туман ҳокими мактабда “Яшил макон” лойиҳаси доирасида амалга оширилаётган ишларни ҳам кўздан кечирди.