Yangi yil bayrami arafasida Farg‘ona viloyati Oltiariq tumani “Fayziobod” mahalla fuqarolar yig‘inida kam ta’minlangan, ehtiyojmand oilalar va nogironligi bo‘lgan shaxslar uchun qurib berilgan uylar foydalanishga topshirildi.

Bir paytlar qarovsiz yotgan 4 qavatli binoda homiylar ko‘magi hamda byudjet mablag‘lari hisobidan 48 ta xonadonli ko‘rkam uy-joy bunyod etilib, oilalarga to‘lovlarsiz berildi.

Tadbirda ishtirok etgan Farg‘ona viloyati hokimi Xayrullo Bozorov barchani Yangi yil bayrami bilan tabrikladi. Ayniqsa, yangi uy-joylarga ko‘chib chiqayotganlar uchun qo‘shaloq shodiyona bo‘lganiga e’tibor qaratdi. Bu uy-joylarda xalqqa xizmat qiladigan, vatanparvar o‘g‘il-qizlar kamol topishiga tilak bildirdi. 

Shundan so‘ng tumandagi “Yoshlar” daftariga kiritilgan 53 nafar yigit-qizlarga o‘z-o‘zini band qilishi va daromad manbalariga ega bo‘lishlari uchun inkubator apparatlari, motokultivator, pishiriqlar uchun pechlar, tikuv mashinalari topshirildi.