Янги йил байрами арафасида Фарғона вилояти Олтиариқ тумани “Файзиобод” маҳалла фуқаролар йиғинида кам таъминланган, эҳтиёжманд оилалар ва ногиронлиги бўлган шахслар учун қуриб берилган уйлар фойдаланишга топширилди.

Бир пайтлар қаровсиз ётган 4 қаватли бинода ҳомийлар кўмаги ҳамда бюджет маблағлари ҳисобидан 48 та хонадонли кўркам уй-жой бунёд этилиб, оилаларга тўловларсиз берилди.

Тадбирда иштирок этган Фарғона вилояти ҳокими Хайрулло Бозоров барчани Янги йил байрами билан табриклади. Айниқса, янги уй-жойларга кўчиб чиқаётганлар учун қўшалоқ шодиёна бўлганига эътибор қаратди. Бу уй-жойларда халққа хизмат қиладиган, ватанпарвар ўғил-қизлар камол топишига тилак билдирди. 

Шундан сўнг тумандаги “Ёшлар” дафтарига киритилган 53 нафар йигит-қизларга ўз-ўзини банд қилиши ва даромад манбаларига эга бўлишлари учун инкубатор аппаратлари, мотокультиватор, пишириқлар учун печлар, тикув машиналари топширилди.