Buxoro viloyati Kogon tumani Qalqon qishlog‘idagi «Kamol Jamol» fermer xo‘jaligi rahbari Azamat Amonov 30 yoshda. Ko‘p yillar Rossiya Federatsiyasida ishlab qaytgan yurtdoshimiz mamlakatimizda yoshlarga bo‘lgan e’tiborni, yaratilgan shart-sharoitlarni ko‘rib, qishlog‘ida tadbirkorlik faoliyatini yo‘lga qo‘yishni maqsad qildi.

Azamatning yetarli mablag‘i bor, ammo yer masalasida muammolar kelib chiqishini o‘ylab Kogon tuman Xalq qabulxonasiga murojaat qildi. 1-sektor rahbari, tuman hokimi qabuliga kirib, baliqchilik bilan shug‘ullanish uchun qishlog‘idagi qarovsiz yotgan yerdan 1 gektar ajratilishini so‘rab, murojaat qildi.

Murojaati qanoatlantirilib, mutaxassislar yordami bilan baliqchilik faoliyatini boshladi.

– Faoliyatimni kengaytirish uchun yana tuman hokimiga murojaat qildim, – deydi tadbirkor Azamat Amonov. – 42 gektar yer olib unda paxtachilik, g‘allachilik, quyonchilik  va chorvachilikni ham yo‘lga qo‘ydim. Yaqin orada yilqichilik bilan ham shug‘ullanishni rejalashtirganman.

Tadbirkor chorvachilikni rivojlantirish uchun xorijdan «Golshteyn» va «Angus» zotli 2 ta qoramol sotib olgan. Hozirgi kunda ularning soni 43 taga yetdi. Har bir bosh qoramoldan kuniga 20-25 litr sut olib, bog‘cha va maktablarga yetkazmoqda.

Shuningdek, xo‘jalikda «Kaliforniya» zotli quyonlar ham parvarishlanmoqda.

– 15 gektar maydonda paxta yetishtirgan yosh tadbirkor shartnomaviy rejani 120 foizga bajardi, – deydi Kogon tuman Xalq qabulxonasi mudiri S.Mirzayev. – 18 gektar yer maydonda esa bug‘doy yetishtirib, shartnomaviy rejani ortig‘i bilan uddaladi. Shuningdek, bog‘ tashkil etib, 2,5 gektar yerda o‘rikzor, 0,60 gektar maydonda behi ko‘chatlari o‘tqazdi. Natijada, oila a’zolaridan tashqari 4 nafar fuqaroni ish bilan ta’minladi.