So‘nggi paytlarda sudlarga murojaatlar ko‘paymoqda. Bu esa mamlakatimizda odil sudlovni ta’minlash, fuqarolarning haq-huquqlari sudlarda munosib himoya qilinayotganidan, shuningdek, fuqarolarning huquqiy ongi va huquqiy madaniyati yuksalayotganidan dalolatdir.

Navoiy viloyat sudi raisi o‘rinbosarlari tomonidan Zarafshon shahri, Nurota, Tomdi va Uchquduq tumanlari aholisiga qulaylik yaratish hamda ularning sarson bo‘lishining oldini olish maqsadida navbatdagi onlayn qabul o‘tkazildi.

Unda sud-huquq sohasiga oid masalalar yuzasidan 29 nafar jismoniy va yuridik shaxslar ishtirok etdi.

– Onlayn qabulda 17 nafar fuqaro murojaati qanoatlantirildi, 2 nafar fuqaroga huquqni muhofaza qiluvchi organlarga murojaat qilishi tushuntirilgan bo‘lsa, 10 nafar fuqaroning arizasi sudda tegishli tartibda ko‘rib chiqish uchun qabul qilindi, – deydi viloyat sudi bosh konsultanti Aziza Ro‘ziyeva. – Shuningdek, jazo muddatini o‘tayotgan, jazoni o‘tash davrida ichki tartib qoidalarga to‘liq rioya qilgan, intizomiy jazolarga tortilmagan, ijobiy tavsifnomaga ega, mehnatga halol munosabatda bo‘lgan 4 nafar mahkumga O‘zbekiston Respublikasi Jinoyat Kodeksining 73-moddasiga asosan jazodan muddatidan ilgari shartli ravishda ozod etish hamda 9 nafar mahkumga O‘zbekiston Respublikasi Jinoyat Kodeksining 74-moddasiga asosan jazoni yengilrog‘i bilan almashtirish yuzasidan kiritilgan taqdimnomalar qanoatlantirildi.