“Ayollar daftari” ro‘yxatiga kirgan ishsiz, ijtimoiy kam ta’minlangan xotin-qizlarni qo‘llab-quvvatlash va ularga har tomonlama ko‘mak ko‘rsatish borasida "Mahalla" xayriya jamoat fondi Sirdaryo viloyati Yangiyer shahar bo‘limida ham tizimli ishlar yo‘lga qo‘yildi.

"Saxovat va ko‘mak" jamg‘armasi hisobidan ijtimoiy kam ta’minlangan va sog‘ligida muammosi bo‘lgan 13 nafar fuqaro uchun 131 million 418 ming so‘m mablag‘ Sog‘liqni saqlash vazirligi tarkibidagi tibbiyot muassasalariga o‘tkazib berildi.

Bundan tashqari ishsiz, ammo biror-bir hunar bilan shug‘ullanish istagida bo‘lgan 152 nafar fuqaroga 289 million so‘m pul mablag‘i hisobiga zamonaviy tikuv dastgohlari olib berildi.

– Ko‘pdan buyon ishsiz edim, – deydi yangiyerlik Sabohat Jo‘rayeva. – Lekin tikuvchilik bilan shug‘ullanish istagim bor edi. Ro‘zg‘orimdan orttirib, tikuv dastgohni olib, o‘z faoliyatimni boshlay olmayotgandim. "Ayollar daftari"ga kiritishdi va endi orzuyimga erishdim. Hozir tikuvchilik bilan uyda shug‘ullanyapman. Bolajonlar, qolaversa, xotin-qizlar uchun bejirim va chiroyli ko‘ylaklar tikyapman. Daromadim ham yomon emas. O‘z ustimda ishlab, faoliyatimni kengaytirmoqchiman.

Xotin-qizlar o‘z biznesini yo‘lga quyish uchun bir zum bo‘lsada tingani yo‘q. Muhimi, ro‘zg‘origa tikuv dastgohiga qo‘shilib shodlik, quvonch, baraka kirib keldi.