Samarqand viloyat sudida uch avlod uchrashuvi tashkil etildi. Tadbirda pensiyadagi faxriylar, bugungi kunda faoliyat ko‘rsatayotgan sudyalar va yosh sud xodimlari ishtirok etdi.

Viloyat sudi raisi O.Hayitov samarqandlik toʻrt nafar pensiya yoshidagi sudya va sud xodimlariga sudyalar Oliy kengashining “Oʻzbekiston sud faxriysi” guvohnomasini tantanali topshirdi va ustozlarni yuksak eʼtirof bilan tabrikladi.

– 1976 yilda o‘qishni tugatib, Samarqand tuman sudiga ishga kelganman. Shu bilan roppa rosa qirq yil uzluksiz ishlab, 2016 yilda pensiyaga chiqdim, - dedi sud faxriysi Shoista Jalilova. – Biz ishlagan davrlarda hozirgidek sharoitlar bo‘lmagan. Bino eski, zax, qishda sovuq bo‘lardi. Jihozlar ham, sharoitlar ham haminqadar edi. Bugun sudyalarga bo‘lgan e’tiborning qadriga yetib, har qancha fidoyilik bilan, sadoqat bilan ishlasangizlar arziydi. Biz keksalarga berilgan e’tibor uchun Prezidentimizga, Oliy sud va Sudyalar oliy kengashiga hamda viloyat sudi rahbariyatiga minnatdorchilik bildiramiz.

Tadbirda viloyat sudi faxriylar kengashi raisi I.Saidov va sudyalar faxriylarni qutladilar. Yosh sudyalarga bugungi e’tiborga munosib bo‘lib faoliyat ko‘rsatish, hamisha adolat uchun xizmat qilish bo‘yicha maslahat va tavsiyalar berildi.