Samarqandda joriy yilda respublika investitsiya, “Obod qishloq” va “Obod mahalla” dasturlari hamda Prezidentimizning shu yil 15-16 aprel kunlari viloyatga tashrifi davomida bergan topshiriqlari asosida 97 ta maktabda rekonstruksiya va mukammal ta’mirlash ishlari olib borilmoqda. Jumladan, 2 ta yangi maktab qurilayotir.

Xalq ta’limi vaziri Sherzod Shermatov Samarqandda bo‘lib, ushbu maktablarda olib borilayotgan qurilish jarayonlari bilan tanishdi, deb xabar bermoqda viloyat xalq ta’limi boshqarmasi axborot xizmati.

Samarqand shahridagi 40-umumta’lim maktabida 1511 nafar o‘quvchi ta’lim oladi. Ayni paytda maktabning 824 o‘rinli binosi hamda sport zali mukammal ta’mirlanmoqda. Shuningdek, shahardagi 14-umumta’lim maktabining 920 o‘rinli binosida ham bugungi kunda 5 milliard 100 million so‘m miqdoridagi mukammal ta’mirlash ishlari olib borilmoqda.

Xalq ta’limi vaziri quruvchilar va maktablar rahbarlari bilan suhbatlashib, har bir ob’ektning sifatli qurilishi va o‘z vaqtida foydalanishga topishirilishi yuzasidan fikrlashib oldi.

Shuningdek, Sherzod Shermatov viloyat xalq ta’limi boshqarmasi va tuman, shahar bo‘limlari rahbarlari bilan yangi o‘quv yiliga tayyorgarlik masalalarini muhokama qildi.