Jizzax viloyatidagi oliy ta’lim muassasalarining rektorlari Zomin tumanida qishloq yoshlari bilan uchrashib, ular bilan ochiqmuloqot o‘tkazdi.

Tumanning Yoshlik mahallasidagi 5-umumta’lim maktabni bu yil 130 nafar o‘quvchi yoshlar bitirayotir. Mustaqil hayot ostonasidagi bu yoshlarning aksariyati oliy ta’lim muassasalariga kirib o‘qishni davom ettirish niyatida. Ayni paytda ularni kasbga to‘g‘ri yo‘naltiruvchi maslahatlar juda zarur.

Shuning uchun qishloqqa Jizzax davlat pedagogika instituti rektori, professor Shavkat Sharipov, Jizzax politexnika instituti rektori, texnika fanlari doktori Alisher Usmonqulov, O‘zbekiston milliy universiteti Jizzax filiali direktori Olimjon To‘raqulov qishloqqa kelib, kerakli maslahat va tavsiyalarni berdi.

Uchrashuvda rektorlar yoshlarga o‘zlari rahbarlik qilayotgan oliygoh haqida batafsil ma’lumot berdi. bugungi zamon talabiga mos kadrlar tayyorlash uchun oliy ta’lim muassasasi moddiy texnik bazasini mustahkamlashda, zamonning tezkor talablariga mos ilmiy tadqiqotlarni amalga oshirish uchun kafedralar va laboratoriyalar faoliyatini yanada yaxshilashda keyingi yillarda amalga oshirilgan ishlar, talabalar uchun qulayliklar haqida gapirib berdi.

Yangi tashkil etilgan fakultetlar istiqbollari, qishloqlarda yangi ish o‘rinlari yaratish, iqtidorli yoshlarni har tomonlama qo‘llab-quvvatlash uchun amalga oshirilayotgan ishlar haqidagi ma’lumotlar yoshlarda katta qiziqish uyg‘otdi.

Uchrashuv davomida hukumat qarorlari asosida oliygohlarga hujjat topshirgan abituriyentlarga berilishi ko‘zda tutilgan imtiyozlar, kunduzgi, sirtqi, kechki va masofaviy ta’lim yo‘nalishlari haqida ham batafsil tushunchalar berildi.

Ochiq muloqotda yoshlar o‘zlarini qiziqtirgan barcha savollarga javoblar oldi.