Navoiy viloyati Uchquduq tumanidagi “Kelajak” yoshlar markazida “Yoshlar daftari”ga kiritilgan yoshlar bilan uchrashuv bo‘lib o‘tdi.

“Mikrokreditbank” aksiyadorlik tijorat banki boshqaruvi raisi o'rinbosari Kamoliddin Atayev, tuman hokimi Soli Hamroyev va yoshlar ishtirok etgan ochiq muloqotda yoshlarni intellektual, ijodiy va boshqa yo‘nalishdagi salohiyatini rivojlantirish, shart-sharoitlar yaratish, qo‘llab-quvvatlash tizimi yo‘lga qo‘yilgani ta’kidlandi.

Uchquduq kasb-hunar maktabi o‘qituvchisi Suxrob Olimov, Ilyos Xo‘jamov, Sanimay Tumeshova so‘zga chiqib, o‘z taklif va istaklarini bayon etdi.

– Turmush o‘rtog‘im “Yoshlar daftari”da ro‘yxatda turadi, uyda tikuvchilik qiladi, – dedi Ilyos Xo‘jamov. – Faoliyatini kengaytirishda amaliy ko‘mak kerak. Keyinchalik u ishini kengaytirib, ish o‘rinlarini ham yaratishi mumkin.

Sanimay Tumeshova “Shalxar” ovulida yashashi, imtiyozli foizlarda kredit ajratilsa, chorvachilik bilan shug‘ullanmoqchiligini bildirdi. Mayda shoxli mol parvarishlash uchun yetarli malakaga ega ekanini bayon etdi.

“Qulquduq” ovulidan uchrashuvda ishtirok etgan Qurishbek Jarquatov ham “Yoshlar daftari”da ro‘yxatda turgan. U 39 million so‘m miqdorida imtiyozli kredit olib, “Yerler ata” shifobaxsh suvini qadoqlashni yo‘lga qo‘ygan. Bir paytlar ishsizligi bois, ro‘yxatda turgan Qurishbek bugun ish beruvchi. Hozirda 3 nafar tengdoshini ish bilan ta’minlagan.

Uchrashuvda so‘zga chiqqan Q.Jarquatov ishlab chiqarayotgan mahsulotiga talab kattaligi, buyurtma ko‘pligi bois, faoliyatini yanada kengaytirishni maqsad qilgan. Uning murojaati uchrashuvning o‘zida hal etilib, imtiyozli kredit ajratiladigan bo‘ldi.

Tadbir so‘ngida Yulduz Abdumurodova, Gulira’no Qahhorova, Gulchehra Eshpo‘latova, Mahbuba Parmonova, Zaynabxon Asqarova, Ozoda A’zamova singari “Yoshlar daftari”da ro‘yxatda turgan yoshlarga gaz plita, elektr pechi, elektr go‘sht maydalagich, tikuv mashinasi, kompyuter jamlanmasi bepul berildi.

Endilikda bu yoshlar tikuvchilik, pazandachilik, kompyuter xizmati yo‘nalishlarida faoliyat olib borib, o‘zini o‘zi band qiladi.