Buxoro tumanidagi Xonobod MFY 25-sonli umumta’lim maktabi binosida «Ayollar daftari», «Yoshlar daftari» va «Temir daftar»lariga kiritilgan fuqarolar bilan viloyatdagi huquq tartibot idoralari rahbarlarining sayyor qabuli bo‘lib o‘tdi.

Qabulda 15 nafar fuqaroning murojaatlari ko‘rib chiqildi. Shundan «Yoshlar daftari»ga kiritilgan fuqaro Sh.Ziyodullayevga mototraktor va uning barcha anjomlari kredit asosida olib berildi.

– Rahbarlarga qilgan murojaatim zoye ketmadi, – deydi Sh.Ziyodullayev. – Bahor oyida tomorqada ish qizg‘in bo‘ladi. Bunga asosan mototraktordan foydalanamiz. Kreditga olgan mototraktor bilan o‘zimni va qishloqdoshlarimni tomorqasida ishlab oilamga daromad olib kelaman.

Qabulda Xonobod MFY, Xonobod qishlog‘ida yashovchi 1-guruh nogironi fuqaro R.Xayrullayevga tuman prokurori tashabbusi bilan nogironlik aravachasi berildi.

Hududdagi «Ayollar daftarida» ro‘yxatda turuvchi 11 nafar ayolga kredit asosida hamda bir nafariga homiylar tomonidan tikuv mashinasi berildi.

«Yoshlar daftari» bo‘yicha yoshlarga kredit berish masalasida tavsiyalar berildi. Ularga kredit hujjatlarini rasmiylashtirishi uchun AT «Xalq banki»ning Gala-osiyo filialiga yo‘llanma taqdim qilindi.